Áleýmettik dúken jumysshylary ashýly turǵyndarǵa toıtarys bere almaı, saldarynan eki satýshy jedel járdem kóligimen aýrýhanaǵa jetkizilgen.
«Taraz» ÁKK aımaqtyq turaqtandyrý qoryn basqarý sektorynyń qyzmetkerleri birden turǵyn úı keshenine kelip, oqıǵanyń mán-jaıyn anyqtady.
«Turǵyndarǵa qanttyń taýsylǵanyn aıtqanymyzda bizge senbeı aıqaı shyǵardy. Taýardy tyǵyp qoıǵandaı kinálap, aıyptady. Barlyǵy 70-teı adam jınalǵan bolatyn. Olar sózimizge senbeı, dúkenge basyp kirdi. Qazir qyzdar munda jumys isteýge qorqady», deıdi aǵa satýshy-kassır Dınara Shalabaeva.
Anyqtalǵandaı, ashýly turǵyndar ǵımaratqa kirip, qyzmetkerlerdiń birin ıterip, jerge qulatyp jibergen. Ekinshisiniń qolyn burap kúsh kórsetken. Muny kórgen dúken satýshylarynyń biriniń jaǵdaıy nasharlap, jedel járdemge júgingen.
«103» pýltine qaladaǵy dúkenderdiń birinde tóbeles bolyp jatqany týraly birneshe ret qońyraý tústi. Belgili bolǵandaı, satyp alýshylar dúken jumysshylaryna shabýyl jasap, judyryq ala júgirgen. Olardyń qatarynda júkti áıel de bar. Barlyǵyna shuǵyl kómek kórsetildi», deıdi Jambyl jedel járdem stansııasynyń aǵa feldsheri Baqytjan Erejepov.
Aıta ketý kerek, atalǵan oqıǵa boıynsha polısııaǵa ótinishter, habarlamalar jáne qandaı da bir shaǵymdar túspegen. Polıseıler oqıǵa ornynda bolǵan turǵyndarǵa aldyn-alý sharalary men túsinikteme jumystaryn júrgizdi.
«Halyqtyń qaýipsizdigin qamtamasyz etý maqsatynda biz joǵaryda atalǵan obektige polısııa qyzmetkerin bólý týraly sheshim qabyldadyq. Bul qoǵamdyq tártip pen tynyshtyqty saqtaýǵa múmkindik beredi», dedi polısııa qyzmetkerleri.
Áleýmettik dúken qyzmetkerleriniń aıtýynsha, bul qaladaǵy áleýmettik pavılondardaǵy jumysshylarǵa jasalǵan birinshi kúsh kórsetý emes. Áleýmettik dúkendegi taýarlardy ótkerýdiń ózindik erejesi bolǵandyqtan, satýshylar turǵyndarǵa túsinistikpen qaraýǵa shaqyrady.
