Jastar jumyssyzdyǵynyń sebebi nede?

Atyraýda Prezıdent janyndaǵy jastar saıasaty jónindegi keńestiń HVII kóshpeli otyrysy ótti. Oǵan elimizdegi barlyq oblystardyń jastar saıasaty máseleleri jónindegi basqarma basshylary, sonymen birge, Atyraý, Aqtóbe, Batys Qazaqstan jáne Mańǵystaý oblystarynyń jastar resýrstary men jastar uıymdarynyń ókilderi qatysty. Kóshpeli otyrysta jastar arasyndaǵy jumyssyzdyq máselesi keńinen talqyǵa salyndy. Qazir statıstıkalyq málimetke súıensek, elimizde 14 pen 29 jas aralyǵynda 4376148 jas bar dep esepteledi. Olardyń 116,1 myńy jumyssyzdar sanatyn quraıdy. О́tken jyly jas­tar arasyndaǵy jumyssyzdyq deńgeıi 5,5 paıyzdy qurap otyr. Jastardyń jumyssyzdyǵy jónindegi eń joǵary kórsetkish Soltústik Qazaqstan (7,6 paıyz), Jambyl (7,4 paıyz), Qyzylorda (6,7 paıyz) oblystarynda tirkelgen. Batys aımaqtaǵy jumyssyz jastardyń shoǵyry Mańǵystaý oblysyna (7,5 paıyz) tán ekeni jasyryn emes. (Atyraý oblysynda 3,5%, Batys Qazaqstan oblysynda 4,8%, Aqtóbe oblysynda 3,2%). Taldaý kórsetkendeı, jastar jumyssyzdyǵyna birinshi kezekte eńbek naryǵyndaǵy suranys jónindegi aqparattyń azdyǵy, sonymen qatar, oqý oryndary men óndiristiń arasyndaǵy baılanystyń joqtyǵy sebep bolyp otyr. Buǵan qosa jastardyń kásibı biliminiń jetimsizdigi, eńbek tájirıbesi men biliktiligi joqtyǵy da áser etedi. Muny ótken jyly jumyssyzdardy tirkeý oryndaryna 150 myń jas habarlasqan. Olardyń 68 myńy aýyldyq jerlerde turatynyn kórsetken. Byltyr jumyssyz jastardyń 56 paıyzy (84,7 myń adam) jumysqa ornalastyryldy. Sol jastardyń 46 paıyzy (39 myń adam) aýyldyq jerlerde turady. Sońǵy bes jyldan beri jastardyń eńbek tájirıbesin qalyptastyrý úshin «Jastar tájirıbesi» jobasy iske asyrylyp, oǵan oqý oryndarynyń 176 673 túlegi qatysty. Endi osy jobaǵa qatysatyn jastarǵa 33 336 teńge kóleminde jalaqy tóleý kózdelip otyr. Joldasbek ShО́PEǴUL, «Egemen Qazaqstan». Atyraý oblysy.