Fransýz jýrnalısi Frederık Lekler-Imoff Severodonesk mańynda qaza bolǵan. 32 jastaǵy tilshi Fransııanyń BFM arnasyna Donbasstaǵy áskerı qaqtyǵystardy habarlap otyrǵan, beıbit turǵyndardy evakýasııalaýdy taspaǵa túsirgen. Bul onyń Ýkraınaǵa ekinshi sapary edi. Lýgansk oblysynyń basshysy Sergeı Gaıdaı jýrnalıst moıyn tusyna tıgen snarıad synyqtarynan jaraqat alyp, qaza bolǵanyn habarlady. Fransýz tilshisi men áriptesteri otyrǵan brondy shaǵyn avtobýsty Reseı áskerleri Lısıchansk qalasyna bara jatqan jolda atqylaǵan. Taǵy bir fransýz jýrnalısi Maksım Brandsteter men fransýz fıksatory Oksana Leýta da jaralanǵan. «Reportery bez granıs» úkimettik emes uıymynyń málimdeýinshe, qazir olardyń ómirine eshqandaı qaýip tónip turǵan joq.
«Reseı áskerıleri qasaqana shabýyl jasap otyr, sóıtip, olar beıbit turǵyndar men BAQ ókilderiniń halyqaralyq quqyqtaryn buzýda», dep resmı túrde málimdedi «Reportery bez granıs» uıymynyń bas hatshysy Krıstof Delýar.
«Jýrnalısterdi qorǵaý komıteti fransýz jýrnalısi Frederık Lekler-Imofftyń Ýkraınadaǵy soǵysty jarııalaý kezinde qaza bolýyna baılanysty qaıǵyryp kóńil aıtady», dep habarlady komıtet dırektory Robert Mahonı. Ol Reseı men Ýkraına bıligin onyń óliminiń mán-jaıyn muqııat tekserýge shaqyrdy. «Bul Reseıdiń Ýkraınaǵa qarsy soǵysy saldarynan beıbit turǵyndardyń jan túrshigerlik jaǵdaıda qurban bolýlarynyń taǵy bir mysaly. Jýrnalıster – soǵys aımaqtarynan reportaj jasaǵanda erekshe batyldyq tanytatyn azamattyq tulǵalar, sondyqtan olar áskerılerdiń nysanasyna alynbaýy kerek, olardyń quqyqtary qatań saqtalýy kerek», dep málimdedi Robert Mahonı.
Al TASS agenttigi Ýkraına Qarýly kúshteriniń akkredıtasııasyna sáıkes, Ýkraına áskeri jýrnalısterdiń ómirine jaýapty emes dep jazdy LPR Jýrnalıster odaǵynyń tóraǵasy Leonard Svıdovskııdiń sózine silteme jasap. Agenttik qyzmetkeriniń aıtýynsha, fransýz tilshisi qaza bolǵan kezde ol ıdentıfıkasııalyq keýdeshe kımegen.
Buǵan deıin Jýrnalısterdiń ádilettilik qory (JFJ) Reseı soǵys bastaǵannan beri Ýkraınada jýrnalısterge jasalǵan 35 shabýyl aktisin tirkegen. Qasaqana shabýyldardyń kóbin reseılik qarýly kúshter jasady, dep habarlady «Azattyq» radıosyna bergen suhbatynda Londondaǵy qordyń basshysy Marııa Ordjonıkıdze.
«Ýkraınadaǵy áskerı qaqtyǵys kezinde Reseı kúshteriniń qolynan qaza tapqan ózge de jýrnalıster qasaqana shabýyldyń qurbany bolǵan», deıdi Jýrnalısterdi qorǵaý komıteti. Nıkolaev mańyndaǵy urys kezinde jýrnalıst Vıktor Dýdardyń qaza bolýy eń birinshi tirkelgen oqıǵa boldy. Sonymen qatar tikeleı efırdegi operator Evgenıı Sakýn Kıevte zymyran shabýyly kezinde qaza bolǵan. Al amerıkalyq vıdeojýrnalıst jáne The New York Times gazetiniń burynǵy tilshisi Brent Reno Irpındegi baqylaý-ótkizý beketinde qaza bolǵan. Brent Reno, sondaı-aq derekti kınorejısser bolǵan. Ol aǵasy Kreıgpen otty núktelerden túsirilim jasaǵan. Olar – Irak pen Aýǵanstandaǵy soǵystardy, Gaıtıdegi jer silkinisin, Mysyr men Lıvııadaǵy tártipsizdikterdi túsirgen sanaýly jýrnalıstiń biri. Aǵaıyndylar radıo men teledıdarǵa qosqan úlesi jáne basqa da marapattary úshin Pıbodı syılyǵyn alǵan.
Sonymen qatar Jýrnalısterdi qorǵaý komıteti Ýkraınada jumys istep júrgen BAQ ókilderine saǵat saıyn shabýyl jasalatynyn aıtyp, dabyl qaqty. Olar áskerı jýrnalısterdiń ómirlerine alańdap, málimdeme jasaǵanymen, esh nátıje joq. «Reseı kúshteri halyqaralyq tártipke oraı, qyzmette júrgen azamattardy, ásirese jýrnalısterge shabýyl jasaýǵa bolmaıtynyn qaperlerine almaı otyr», deıdi komıtet basshylyǵy. Olar qazirgi tańda kisi óltirýge oqtalýdyń 10 faktisi tirkelgenin aıtady. Komıtettiń jazbasha málimdemesinde: «Shveısarııalyq jýrnalıst Gııom Brıket zardap shekken, ony da reseılik áskerler tonap ketti; Chehııadaǵy Voxpot basylymynyń eki jýrnalısi Maıda Slamova men Voıteh Bogachqa reseılik áskerler oq jaýdyrdy; Ekstra-Bladet-tiń Danııadaǵy eki tilshisi, jýrnalıst Stefan Veıhert pen fotograf Fıltenborg Mıkkelsen tıgen oqtan jaraqat aldy, reseılik áskerler brıtandyq Sky News telearnasynyń qyzmetkerlerine – bas tilshi Stıýart Remsı jáne onyń tórt áriptesine shabýyl jasaǵan. Olar Kıevke qaıtyp kele jatqanda shabýylǵa tap bolǵan» delingen. Sonymen qatar «Azattyq» radıosynyń jýrnalısi Marıan Kýshnır Kıevtiń shyǵysyndaǵy Baryshıvkada jaraqat alǵan. Jýrnalıst redaksııalyq tapsyrmany oryndap jatqan kezde shabýyl bastalyp ketken. Al Kıevte Reseıde sheteldik agent dep tanylǵan «Azattyq» radıosynyń ýkraınalyq bıýrosynda jumys istegen jýrnalıst ári prodıýser Vera Gırıch zymyrannyń kópqabatty turǵyn úıge túsýinen qaza tapty. Onyń denesi úıindi astynan shyǵarylǵan. Medıa korporasııasynyń prezıdenti Djeımı Flaı «Vera Gırıch ózi jaqsy kóretin elinde jáne qalasynda qaza boldy, alaıda jantúrshigerlik jaǵdaıda qaza bolǵany janǵa batady. Biz kásibıligimen jáne mıssııamyzǵa adaldyǵymen este qalatyn qymbatty áriptesimizden aıyryldyq», dep jazdy. Al BAQ ókilderi 13 naýryzda Kıev túbindegi Gýta aýylynda fototilshi Maks Levın iz-tússiz joǵalyp ketkenin habarlaǵan edi. Jýrnalıstiń denesin sáýir aıynda tapqan. Sonymen qatar 2 sáýirde derekti fılm túsiretin lıtvalyq jýrnalıst Mantas Kvedarovıchıýs Marıýpolde baqılyq boldy. Ol soǵys jaıly jańadan derekti fılm túsirmek bolyp júrgen jerinde Reseı áskeriniń shabýylynan qaza tapty. Bul kóz jumǵandardyń resmı deregi ǵana, al Jýrnalısterdi qorǵaý komıteti budan ózge kóptegen jýrnalıst ustalyp, azaptalǵanyn aıtady.
6 maýsym Ýkraınada jýrnalıster kúni bolyp bekitilgen. Osy kúni Reseı men Ýkraına soǵysy bastalǵaly 32 jýrnalıst qaza tapty, dep habarlady áleýmettik jelide Ýkraınanyń mádenıet jáne aqparattyq saıasat mınıstri Aleksandr Tkachenko. «Sońǵy 4 aıdyń ishinde 32 áriptesimizden aıyryldyq, sońǵy segiz jylda odan da kóp jýrnalıst qaza tapty. Sizder – batyrsyzdar. Sizderdiń batyrlyǵyńyz ben qyzmetińizge degen adaldyǵyńyzǵa baǵa jetpeıdi», dep jazdy ol.
