AQSh úkimetiniń málimetteri boıynsha, koronavırýstyq pandemııaǵa baılanysty janarmaı baǵasy 2020 jyldyń sáýirinen bastap kóterildi. 1,80 dollar bolǵan baǵa 2021 jyldyń mamyrynda 3 dollarǵa jetse, osy jyldyń naýryz aıynda 4 dollardan asty. Endi mine maýsymda gallonyna 5 dollarǵa deıin kóterilip otyr. «О́tken jyldyń sáıkes ýaqytymen salystyrǵanda janar-jaǵarmaı baǵasy $1,92 joǵary boldy. Baǵa kórsetkishi Kalıfornııada 6,43 dollardan, Mıssısıpıde 4,52 dollarǵa deıin aýytqyp tur», deıdi AQSh avtokólik qaýymdastyǵy. «Álemdik munaı baǵasy birkelki emes, biraq kúrt ósýde. Dúnıe júzindegi munaı baǵasy shamamen eki ese ósti, al AQSh-taǵy etalondyq baǵa dál osyndaı somaǵa ósti. Baǵanyń ósýine birneshe faktor áser etedi. Reseıdiń Ýkraınaǵa basyp kirýi jáne odan keıin AQSh pen onyń odaqtastarynyń sanksııalary janarmaı ósimine túrtki boldy», deıdi sarapshylar.
Sonymen qatar «Munaı men janar-jaǵarmaı qorlarynyń taýsylýy ekonomıkanyń qalpyna kelýine baılanysty energııa tutynýdyń ósýine áser etedi. Sondaı-aq amerıkalyqtar mamyr aıynyń sońyndaǵy «Eske alý kúninen» bastap kóbirek kólik júrgizgen, bul suranysty arttyrady», dep qosty olar. Al AQSh Energetıka mınıstrliginiń málimetinshe, AQSh álemdegi eń iri munaı óndirýshi el bolyp tabylady, biraq onyń munaıdan benzınge deıingi qýattylyǵy 2019 jyldyń sońynan beri táýligine 900 myń barrelge tómendegen. Eýropalyq odaq basshylary bolsa osy jyldyń sońyna deıin reseılik munaıdyń basym bóligine tyıym salýǵa ýáde berip otyr.
Birqatar sarapshynyń boljaýynsha, AQSh-taǵy janarmaıdyń ortasha baǵasy tamyz aıynda bir gallon úshin 6 dollardan da asýy múmkin. Reseıdiń eksporty qysqarǵannan keıin janarmaı daǵdarysy AQSh-pen qatar Eýropa, Azııa elderinde de baıqalyp otyr. Qazirde Ulybrıtanııada benzın baǵasy gallonyna 7,70 dollar, Nıderland pen Germanııada 8,25 dollar, Danııada 9 dollarǵa jetken.
