Aqtóbede meshittiń burynǵy bas ımamy abaısyzda kisi óltirdi

AQTО́BE. 24 sáýir. Aqtóbe oblysynda bir meshittiń burynǵy bas ımamy bolǵan azamat óziniń jaqyn týysyn kúrekpen uryp, munyń sońy kisi ólimimen aıaqtaldy. Bul týraly Bnews.kz habarlady. Atalǵan oqıǵany tarata aıtar bolsaq, 34 jastaǵy marqum Ernur Atyraýbaev Oıyldaǵy Kókjar meshitiniń burynǵy ımamyn jıi mazalap, tynyshyn alady eken. Sodan shydamy shegine jetken ımam Altynbek Kákıev jaqyn aǵaıyny bolyp keletin ony kúrek sabymen birneshe márte urady. Sonyń saldarynan Ernur Atyraýbaev oqıǵa ornynda tilge kelmeı qaıtys bolady. Osy jáıtke baılanysty Oıyl aýdandyq ortalyq aýrýhanasynyń bas dárigeri Sándibek Nurbaev: «Ernur Atyraýbaev aýrýhanaǵa ákelgende jany shyǵyp ketken. Onyń kóz jumǵandyǵyn ǵana rastadyq. Sosyn tártip saqshylaryna túsindirip, tıisti qujattardy toltyryp berdik», – depti. Qazir Altynbek Kákıev tergeý abaqtysyna jabyldy. О́z qolymen istegenin moıyndady. Aqtóbe oblystyq IID baspasóz qyzmetiniń málimdeýinshe, 1972 jyly týǵan Altynbek Kákıevtiń ústinen Qylmystyq kodekstiń 109-baby 3-bólimi boıynsha is qozǵaldy. Joldybaı Bazar. Derekkóz: Bnews.kz. Foto: Slando.ua.