ASTANA. 23 sáýir. Búgin Astanada Qazaqstan jáne Qytaı memlekettik qyzmet salasyndaǵy yntymaqtastyq jónindegi ekijaqty memorandýmǵa qol qoıdy. Bul týraly egemen.kz tilshisi habarlady.
Memlekettik qyzmet isteri agenttiginiń tóraǵasy Álıhan Báımenov Qytaıdyń adamı resýrstar jáne áleýmettik qamsyzdandyrý mınıstriniń orynbasary Iаn Shısıýmen kezdesti. Kezdesý barysynda memlekettik qyzmet salasyndaǵy ekijaqty yntymaqtastyq jáne Astanadaǵy Memlekettik qyzmet salasyndaǵy óńirlik hab sheńberindegi kópjaqty yntymaqtastyq máseleleri talqylandy.
Agenttik tóraǵasy Qytaı tarapyn Qazaqstan Respýblıkasy memlekettik qyzmetiniń jańa modelimen tanystyrdy. Kezdesý qorytyndysynda Memlekettik qyzmet isteri agenttigi men Qytaıdyń adamı resýrstar jáne áleýmettik qamsyzdandyrý mınıstrligi arasynda memlekettik qyzmet salasynda yntymaqtastyq jónindegi ózara túsinistik týraly memorandýmǵa qol qoıdy. Memorandým sheńberinde kezdesý, bilim almasý jáne memlekettik qyzmet salasyndaǵy máseleler boıynsha is-sharalarǵa qatysý, eki eldiń memlekettik qyzmetshileri úshin kásiptik oqytý sııaqty yntymaqtastyqtyń nysandary kózdelgen.
«Qytaı delegasııasy Qazaqstannyń memlekettik qyzmet salasyndaǵy reformalarmen, bizdiń agenttiktiń jáne ózge de qurylymdyq bólimshelerdiń jumysymen tanysýda. Qazaqstannyń bul saladaǵy reformalary halyqaralyq sarapshylardyń úlken qyzyǵýshylyǵyn týǵyzýda. Bul memorandým ekijaqty qarym-qatynasqa da jáne Astanadaǵy memlekettik qyzmet salasyndaǵy aımaqtyq hab aıasynda da kóp salaly baılanystardy ornatýǵa múmkindik beredi. Eki el arasynda memlekettik qyzmetshilerdi oqytý, birlesken ǵylymı-zertteý jumystaryn júrgizý, tálimdeme men taǵylymdamadan ótkizý syndy reformalar jalǵasady», - dep atap ótti Á. Báımenov qol qoıý rásiminde.
Onyń aıtýynsha, jalpy kelisim bes baǵyttaǵy áriptestikti ornatýdy kózdeıdi. Olardyń qatarynda ózara tájirıbe almasý, birlesken is-sharalar ótkizip, memlekettik qyzmetkerlerge kásibı bilim berý máseleleri qamtylǵan.
Agenttik basshysynyń sózine qaraǵanda, mundaı áriptestik tek Qytaı elimen ǵana emes, Eýroodaq, AQSh, Koreıa, Túrkııa, Japonııa, Reseı memleketterimen qarym-qatynas óte tyǵyz ornaǵan. Sonymen qatar ol bul qadamdar Astanada Ortalyq Azııanyń memlekettik qyzmet habyn qurýdaǵy múddesine saı keletindigin atap ótti.
Qytaı delegasııasynyń músheleri Qazaqstannyń memlekettik qyzmet modelin joǵary baǵalady. QHR Adam resýrstary jáne áleýmettik qamsyzdandyrý vıse-mınıstri Iаn Shısıý Qytaı Qazaqstannyń memlekettik qyzmet júıesinen úlgi alatyndyǵyn atap ótti.
«Qazaqstannyń memlekettik qyzmet júıesi jas bolǵanymen, bul salany jetildirýde óte jańashyl ádis-tásilder paıdalanylǵan, - dedi ol. -Qazaqstan osy salada birqatar zańnamalyq bastamalar engizdi. Bul rette eń aldymen «Memlekettik qyzmet týraly» zańdy atap ótýge bolady. Memlekettik qyzmetshilerdiń jumysyn retteý boıynsha birqatar tıimdi sharalar qabyldanǵan. Qazaqstan óz elindegi jaǵdaıdy, erekshelikterdi eskere otyryp, basqa memleketterdiń ozyq tájirıbesin qoldanýda. Sońǵy jyldary Qazaqstan memleket qyzmette ashyq básekelestik talaptaryn engizý, testileý ótkizý, qyzmetkerlerdi attestasııalaý boıynsha belsendi jumys jasady. Oǵan qosa kadrlardy oqytý, qaıta daıarlaý boıynsha óte jaqsy sharalar qolǵa alynǵan. Osynyń barlyǵy - Qytaı úshin óte jaqsy tájirıbe».
Qytaı delegasııasynyń issaparysheńberinde Agenttiktiń qyzmeti jáne memlekettik qyzmettiń jańa modeli, «e-qyzmet» avtomattandyrylǵan derbes basqarý júıesi, sonymen qatar memlekettik qyzmet salasyndaǵy óńirlik hab tanystyryldy.
Sáken Maılybaı.
Derekkóz: egemen.kz.
Foto: tovary.kuplu.kz.
