Elimizdiń júregi – Astana búginde túrli halyqaralyq sharalardyń bastamashysy ǵana emes, sonymen qatar túrli mádenı qundylyqtarymyzdy dáriptep nasıhattaıtyn ortalyqqa aınalýda. Buǵan óńirlerde ónerge ter tógip júrgen azamattardyń is-áreketi dálel desek, sondaı shyǵarmashylyq ıesiniń biri retinde Elýbaı О́mirzaqov atyndaǵy Qostanaı oblystyq fılarmonııasynyń kórkemdik jetekshisi, Qazaqstannyń eńbek sińirgen qaıratkeri, kúıshi-dırıjer Nazymbek Moldahmetovti ataǵan jón. Jaqynda kúıshi elordada «Dýmandy Tobyl» atty shyǵarmashylyq keshin ótkizdi.
Búkil sanaly ǵumyryn ónerge arnap kele jatqan jannyń keshin Astana qalasy fılarmonııasynyń halyq aspaptar orkestri (kórkemdik jetekshisi ári dırıjeri Qazaqstannyń eńbek sińirgen qaıratkeri, professor Aıtqalı Jaıymov) súıemeldep otyrdy. Konserttiń shymyldyǵyn A.Jaıymovtyń «Dýmandy Tobyl» shyǵarmasy ashty. Razdyqtyń kúıi «Ańshynyń zary» óte sheber oryndaldy.
Avtordyń ózinen bólek ónerdegi zamandastary men izbasarlary da óz ónerlerin ortaǵa saldy. Batyrbek Baınazarov Abyzdyń kúıi «Tolǵaýdy» qobyzben tebirentse, Jazıra Qalıeva N.Tilendıevtiń «Balapandarym» shyǵarmasyn sazsyrnaımen keremet úlgide jetkizdi. Sondaı-aq, daryndy ánshiler Janatbek Kádirov pen Gúlbaný Abdýllına shyrqaǵan Qalıbek Derbisaldınniń «Qostanaı» áni de tyńdarmandy tamsantpaı qoımady.
Ermurat Úsenovtiń «Shaqshaq Jánibek» týyndysy orkestrde tipti qulpyra tússe, Aıtbaı Muzdahanovtyń «Qos Qarlyǵash» kúıin oryndaǵan Anar Muzdahanovany da jıylǵan jurt erekshe iltıpatpen qabyldady. Sultanbek Moldahmetov oryndaǵan Shal aqynnyń termesine tyńdarmannyń rıza bolǵany sonshalyq, termeshiden taǵy bir terme surap zaldan jibermedi. Konsertti Qurmanǵazynyń «Adaı» kúıi qorytyndylady.
Kesh sońynda sóz alǵan Elýbaı О́mirzaqov atyndaǵy Qostanaı oblystyq fılarmonııasynyń dırektory Aleksandr Evsıýkov alǵashqy kezekte Astana qalasy fılarmonııasynyń halyq aspaptar orkestrine óziniń sheksiz alǵysyn aıta kelip, kıeli Torǵaı topyraǵynan túlep ushqan Nazymbek Moldahmetovtiń shyǵarmashylyǵyna toqtaldy. Sondaı-aq, ol atalǵan sharaǵa uly dala sazynyń sarqylmas kórinisi dep baǵa berdi.
Ábdirahman QYDYRBEK,
«Egemen Qazaqstan».
––––––––––––––––––––––
Sýretti túsirgen
Erlan OMAROV.
