Úkimet • 29 Maýsym, 2022

Álıhan Smaıylov Astana Finance Days konferensııasyna qatysty

22 ret kórsetildi

Premer-Mınıstr Álıhan Smaıylov Astana Finance Days 2022 konferensııasynyń «Energetıkalyq jáne azyq-túlik ornyqtylyǵyna ınvestısııalar. Qazaqstandyq keıs» paneldik sessııasynda sóz sóıledi, dep habarlaıdy Egemen.kz primeminister.kz saıtyna silteme jasap.

Is-sharaǵa QR Prezıdenti janyndaǵy Joǵary Keńes tóraǵasynyń reformalar jónindegi orynbasary Ser Sýma Chakrabartı, AHQO basqarýshysy Qaırat Kelimbetov, Energetıka mınıstri Bolat Aqsholaqov, Condor Petroleum Inc. kompanııasynyń basqarýshy dırektory Norman Storm, Çalık Holding-tiń Qazaqstandaǵy aımaqtyq dırektory Kenan Akkırman jáne t.b. qatysty.

Álıhan Smaıylov óz sózinde kómirsýtekter men azyq-túliktiń álemdik naryqtaǵy baǵasy tarıhı eń joǵary deńgeıge jetkenin, bul kóptegen elderde, sonyń ishinde Qazaqstanda da adamdardyń ómir súrý sapasyna áser etetinin atap ótti.

«Osyny túsine otyryp, biz Qazaqstan Prezıdenti Qasym-Jomart Toqaevtyń bastamasymen bıyl qolǵa alynǵan saıası reformalardyń der kezinde júrgizilip jatqanyn baǵalaı alamyz. Saıyp kelgende, bul reformalar memlekettegi tereń ekonomıkalyq ózgeristerge alyp keledi», dedi QR Premer-Mınıstri.

Úkimet basshysy Qazaqstan myqty saıası jáne ekonomıkalyq bazaǵa ıe bola otyryp, EAEO men Qytaıdy qamtıtyn kólemi 1 mlrd-tan astam áleýetti tutynýshysy bar iri álemdik naryqtarǵa shyǵatyn «qaqpa» ekenin jáne Ortalyq Azııadaǵy tranzıttik hab ekenin atap ótti.

Táýelsizdik jyldary elimizge $390 mlrd tikeleı sheteldik ınvestısııa tartyldy, onyń basym bóligi sońǵy 10 jylda salynǵan. Máselen, 2021 jyly ınvestısııalardyń jalpy aǵyny $24 mlrd-ty qurady, bul aldyńǵy jylmen salystyrǵanda 38%-ǵa artyq. Bul rette munaı jáne gaz salasyna salynǵan salymdar nebary 28%-dy ǵana qurasa, 2018-2019 jyldary olardyń úlesi 50%-ǵa teń boldy.

«Bul el ekonomıkasyn ártaraptandyrý belsendi júrip jatqanyn kórsetedi. Shıkizat taýarlary baǵasyna qatysty jahandyq betburysty nazarǵa ala otyryp, energetıkadaǵy jáne aýyl sharýashylyǵyndaǵy múmkindikterimizdi kóbirek zerdeleýimiz qajet», dedi Álıhan Smaıylov.

Premer-Mınıstrdiń aıtýynsha, eleýli tabıǵı qorlary bar elimiz álemdik taýar naryqtarynyń mańyzdy jetkizýshisine aınalady. Sonymen qatar Qazaqstan aýyl sharýashylyǵy alqaptarynyń aýdany boıynsha álemde 6-shy orynda.

«Joǵary qaıta óńdelgen ónimder shyǵarýǵa ınvestısııalar tartý úshin eki sektordyń da basymdyǵy joǵary. Osyǵan baılanysty Úkimet Qazaqstanǵa keletin ınvestorlarǵa qolaıly jaǵdaı jasap, keshendi qoldaý kórsetedi», dep atap ótti Premer-Mınıstr.

Qazirgi ýaqytta Qazaqstanda jeńildetilgen ınvestısııalyq rejım kózdelgen 13 arnaıy ekonomıkalyq jáne 36 ındýstrııalyq aımaq bar. Budan basqa jalpy aǵylshyn quqyǵy rejımi esebinen búkil álemnen ınvestorlardy tartý orny bolyp sanalatyn «Astana» halyqaralyq qarjy ortalyǵy jumys istep tur.

«Úkimet sheteldik ınvestorlardy kelisimsharttar jasasýǵa jáne jańa jobalardy iske asyrýǵa shaqyrady. Biz ınvestorlardyń múddeleriniń barynsha eskeriletinine kepildik beremiz», dedi Álıhan Smaıylov.

27-29 maýsymda «Astana» halyqaralyq qarjy ortalyǵy turaqty damý, áleýmettik jaýapkershilik jáne ósý máselelerine arnalǵan «Astana Finance Days» V konferensııasyn ótkizýde.

Astana Finance Days – óńirdegi qarjy salasyndaǵy eń iri konferensııalardyń biri. Sońǵy tórt jyl ishinde konferensııaǵa 100-den astam elden 15000-nan astam qatysýshy keldi.

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar