Indet qaıta órshidi

Sońǵy málimetter boıynsha Ulybrıtanııada shamamen 2,3 mıllıon adam nemese árbir 30-shy adam vırýs juqtyrǵan. Bul bir apta burynǵy kórsetkishten 32 paıyzǵa kóp. Dertke shaldyqqandardan Omicron shtamynyń qosalqy BA.4 jáne BA.5 nusqalary anyqtalǵan. «Bul jańa eki nusqanyń taralýy óte jyldam», deıdi ınfeksıonıst mamandar.

Maýsymnyń sońǵy aptasynda ONS Anglııa men Ýelste árbir 30-shy, Soltústik Irlandııada árbir 25-shi, Shotlandııada árbir 18-shi adam indet juqtyrǵanyn habarlady. Ulttyq statıstıka basqarmasynyń qyzmetkeri Sara Krofts: «Búkil Ulybrıtanııada biz BA.4 jáne BA.5 nusqalarynyń ósýine yqpal etken jarty mıllıonnan astam ınfeksııanyń turaqty ósýin kórip otyrmyz», dep málimdedi eldiń BAQ ókilderine. Sonymen qatar ol atalǵan jańa ınfeksııalar eldiń barlyq aımaqtarynda jáne barlyq jas toptarynda ósip jatqanyn aıtty.

Dárigerler bolsa áli de vak­sına almaǵandardy, ásirese 75 jastan asqan turǵyndardy Kovıd-19-ǵa qarsy ekpe alýǵa shaqyryp otyr. Dárigerler indetti eńserýdiń birden-bir joly vaksına ekenin aıtady. «Alaıda indet túbegeıli joıylyp ketpegenin bilip otyrsa da adamdardyń birazy áli de ekpe alýǵa qarsy» dep málimdedi olar.

BBC málimeti boıynsha Ang­lııada 30 maýsymda aýrýhanaǵa 9 myńǵa jýyq kovıd pasıenti orna­las­tyrylǵan, al shildeniń úsh kú­ninde olardyń sany eki esege ósken. Sarapshylar Ulybrı­ta­nııanyń qalǵan bóliginen alynǵan derekter az bolǵanymen, osy aıda indetti juqtyrý kúrt ósýi múmkin dep boljap otyr. Alaı­da medısına sarapshylary qa­zirgi ýaqytta aýrýhanalardaǵy ko­vıdpen aýyratyndardyń sany 2021 jyldyń qańtarynda koro­navırýstyń Alfa tolqyny ke­zindegi 34 myńnan astam rekord­tyq kórsetkishinen áldeqaıda tómen ekenin aıtady. «Kovıdke oń nátıje kórsetken aýrýhanadaǵy naýqastardyń barlyǵy emdel­meıdi, keıbireýleri basqa sebep­termen jatyr, bul olarǵa kútim jasaýdy qıyndatyp otyr», deıdi London ortalyq aýrýhanasynyń bas dárigeri. Bul qazir aýrýhanada jatqan naýqastardyń shamamen úshten ekisine qatysty. Anglııada jansaqtaý bóliminde jatqan kovıd pasıentteriniń sany maýsym aıynyń basynda 111-den 211-ge jetken. Statıstıkalyq málimetterge kóz júgirtsek, 2021 jyldyń qańtarynda jansaqtaý bólimsheleri tolǵan kezde 3 700-den astam adam osyndaı kómekke muqtaj bolǵan.

Densaýlyq saqtaý qyz­met­kerleri sońǵy alty aı ishinde ekpe almaǵan 75 jastan asqan kez kelgen adamǵa kovıd dertinen jáne gospıtalızasııadan qorǵaný úshin vaksına alý qajettigin eskertip otyr. Ulybrıtanııanyń Densaýlyq saqtaý qaýipsizdigi agenttiginiń (UKHSA) klınıkalyq baǵdarlamalar dırektory Merı Remsı osy jastaǵy turǵyndardyń shamamen 16 paıyzy áli vaksına almaǵanyn aıtady. Ol sondaı-aq adamdardyń basqalarmen aralasqan kezde qaýipsizdik erejelerin saqtaý qajettigin eskertedi. О́ıtkeni, «qazir adamdar bosańsyp, aýrýdy múldem esinen shyǵarǵan, sondyqtan olar qoǵamdyq jerlerde, jabyq ǵımaratta betperde kıgenderi durys. Eger sizde respıratorlyq ınfeksııanyń belgileri bolsa, sondaı-aq joǵary temperatýra nemese ózińizdi nashar sezinseńiz, úıde nemese basqa adamdardan, ásirese egde nemese osal toptaǵy adamdardan alys bolýǵa tyrysyńyz», dedi doktor Remsı. Sonymen qatar UKHSA-nyń Kovıd boıynsha bas medısınalyq keńesshisi, doktor Sıýzan Hopkıns, BBC-ge: «Meniń oıymsha, bul sýyq tııýden ózge nárse, óıtkeni adamdar 10 kúnge deıin aýyrady, derttiń belgileri bolǵan kezde naýqas basqa adamdardan aýlaq bolýy kerek. Túrli festıval, is-sharalarǵa barýdan bas tatqan jón, óıtkeni bul barlyq jerlerde ınfeksııa qaýpin arttyrady», dedi. Al Lester ýnıversıtetiniń vırýsolog dárigeri Djýlıan Tangtyń aıtýynsha, derttiń qazirgi eki jańa qosalqy nusqasy ózgelerge qaraǵanda kóbirek problema týdyrýy múmkin. «Jaz aılarynda aýrýhanaǵa jatyp emdeletin naýqastardyń sany artýy múmkin, ásirese vaksına almaǵandar, sonymen qatar vaksınasy men tabıǵı ımmýnıteti álsiregen adamdar kóp zardap shegýi múmkin», dedi dáriger.