Amanattyqtar el aımaqtarynyń basym kópshiliginde bolyp, onda saılaýaldy ýádelerdiń oryndalý barysyn tekserip qana qoımaı, azamattardyń túrli máselelerge qatysty ótinishterin qarady.
Máselen, qańtar qasireti saldarynan kásibi zardap shekken Almatydaǵy kásipkerlermen kezdesý barysynda partııalyqtar ótemaqyny ýaqytyly tóleý máselesin baqylaýda ustaýǵa ýáde berdi.
Jıyn barysynda partııa qalalyq fılıalynyń atqarýshy hatshysy Meıirjan Otynshıev 1594 kásipker, ıaǵnı 99%-y 14,5 mlrd teńge kóleminde qarjylaı tólem alǵanyn, bul baǵyttaǵy jumys ári qaraı da jalǵasyp jatqanyn málimdedi.
Oral qalasynda daryndy balalarǵa arnalǵan №8 mamandandyrylǵan mektep oqýshylarynyń ata-analary bilim oshaǵynyń birneshe jyldan beri jóndeýge jabylǵanyn, alaıda eshqandaı jumys júrgizilmeı jatqanyn aıtyp shaǵymdandy.
Partııanyń Batys Qazaqstan oblystyq fılıalynyń atqarýshy hatshysy Murat Muqaevtyń aıtýynsha, oblystyq bıýdjetti naqtylaý kezinde jóndeý jumystaryna qarajat bólindi. Jumys bastalyp ketti. Onyń aıaqtalý ýaqyty 2023 jylǵy tamyzǵa josparlanǵan.
Shymkent qalasynda Ashat Oralov AMANAT partııasynyń saılaýaldy baǵdarlamasyn iske asyrý aıasynda pozıtrondy-emıssııalyq tomografııaǵa arnalǵan jabdyq ornatylǵan qalalyq onkologııalyq ortalyqqa bardy. Shymkent qalasynyń jáne oǵan jaqyn ornalasqan oblystardyń turǵyndary áli kúnge deıin zamanaýı jabdyqta tegin tekserýden óte almaıdy. Sebebi PET-zerthana paıdalanýǵa berilmegen.
Qalalyq fılıaldyń málimetinshe, tomograf qyrkúıek aıynda iske qosylady.
Túrkistan oblysynyń Saran aýdanynda Shornaq aýylynyń turǵyndary aýdan qurylǵannan beri bir jyldan astam ýaqyt ótse de, joldyń nasharlyǵyna jáne kóshe jaryq joǵyna nazar aýdardy.
Partııa aımaqtyq fılıaly basshylyǵynyń aıtýynsha, Shornaq aýylyndaǵy kóshelerdi asfalttaý jáne jaryq shamdaryn ornatý jumystary bıyl jeltoqsan aıynda aıaqtalady.
«Kezdesýlerdiń qorytyndysy boıynsha 88 hattamalyq tapsyrma berildi. Onyń 31-i oryndaldy. Qalǵany oryndalý ústinde. Ár tapsyrmanyń artynda qur sandar emes, adam taǵdyry turǵanyn túsiný kerek. Sondyqtan eshqandaı másele nazardan tys qalmaıdy. О́ńirlik fılıaldar osy máselelerdi sheshý joldaryn tezdetip, apta saıyn aqparat berip turýy tıis», dedi Ashat Oralov.
