Álem • 21 Shilde, 2022

Shrı-Lanka prezıdenti saılandy

Shrı-Lankadaǵy prezıdenttik saılaý kezinde Ranıl Vıkramasınghe jeńiske jetti. Parlament depýtattarynyń basym bóligi eks-premerge daýys berdi. Sarapshylar bul halyqtyń narazylyǵyn odan ári ýshyqtyrýy múmkin ekenin alǵa tartady. О́ıtkeni jańa basshy bılikten qýylǵan prezıdent Gotabaıa Radjapaksaǵa jaqyn tulǵa.

Gúlnar JOLJAN

Alty ret premer-mınıstr qyzmetin atqarǵan Ranıl Vıkramasınghe sársenbide parlamentte jasyryn daýys berý arqyly Shrı-Lanka prezıdenti bolyp saılandy. «Shrı-Lanka táýelsizdik alǵannan bergi eń aýyr ekonomıkalyq daǵdarystan, azyq-túlik pen janarmaı tapshylyǵynan jáne parlamentke degen úlken senim daǵdarysynan zardap shekken ýaqytta, el bıligine kelgen Vıkramasıngheni qıyn jol kútip tur», dep jazady The Guardian.

Jeńiske jetkennen keıingi sózinde Ranıl Vıkramasınghe búkil saıası partııany eldiń ıgiligi úshin birlesip jumys isteýge shaqyrdy. 73 jastaǵy saıasatker 134 daýys, onyń qarsylasy burynǵy buqaralyq aqparat quraldary mınıstri Dýlla Allahaperýma 82 daýys jınady.

Associated Press agenttigi Vıkramasıngheniń saılanýy elde narazylyq qozǵalysyn týdyrýy múmkin ekenin aıtady. О́ıtkeni ol Shrı-Lankanyń burynǵy prezıdentiniń ákimshiliginiń quramynda qyzmet etken. Ranıl Vıkramasınghe osy jyldyń mamyr aıynan bastap premer-mınıstr qyzmetin atqardy. Shildeniń basynda eldegi saıası daǵdarystyń saldarynan prezıdent qashyp ketkennen soń Shrı-Lanka prezıdentiniń mindetin atqarǵan-dy.

Daýys berýge parlamenttik palatada Radjapaksa otbasynyń úsh múshesi bar. Atap aıtqanda, Gotabaıa Radjapaksanyń úlken aǵasy, burynǵy prezıdent jáne premer-mınıstr Mahında Radjapaksa daýys berýge qatysty. Bul Gotabaıa Radjapaksa elden qashýǵa májbúr bolǵannan keıin Radjapaksa otbasynyń kópshilik aldynda alǵash ret shyǵýy.

Vıkramasıngheniń saıasatta júrgenine qyryq jyldan asty. Ony Shrı-Lankany qazirgi eń aýyr saıası jáne ekonomıkalyq daǵdarystan ótkizýge laıyq tulǵa deıtinder de bar. Ásirese elge halyqaralyq Qarjy qorynan qarjylyq kómek kórsetý týraly kelissózder júrgizýge kómektesetin tájirıbeli jáne qabiletti tulǵa dep esepteıdi. Ranıl Vıkramasınghe eldi 2024 jyldyń qarashasyna deıin basqarady.

Biraq onyń qashqyn Gotabaıa Radjapaksamen tyǵyz qarym-qatynasy saılaýshylar arasyndaǵy bedeline nuqsan keltirýi yqtımal. Aragalaıa dep atalatyn elge tanymal narazylyq qozǵalysy músheleriniń kópshiligi ol da bılikten ketkenge deıin narazylyqtaryn jalǵastyrýǵa ant berdi. Sársenbide jasyryn daýys berý kezinde Kolombodaǵy prezıdent hatshylyǵynda Vıkramasıngheniń otstavkaǵa ketýin talap etken únsiz narazylyq aksııasy ótti.