Strategııalyq áriptestik áleýeti artyp keledi

Bıyl Qazaqstan men Ázerbaıjan ara­synda jańa sarapshylar keńesi qu­ry­ldy. Sondaı-aq eki eldiń dıp­lo­matııalyq qatynastarynyń orna­ǵanyna da 30 jyl tolyp otyr. «Táýel­sizdik jyldarynda Nur-Sultan men Baký arasyndaǵy yntymaqtastyq stra­tegııalyq odaqtastyqtyń jańa deńgeıi­ne kóterildi», dedi sarapshylar Keńes otyrysynda.

Ázerbaıjan – Qazaqstan úshin senimdi odaqtas, Ońtústik Kavkaz óńirin­degi strategııalyq mańyzdy serik­tes. Ázerbaıjan arqyly elimiz Túr­kııa­ǵa, odan ári Eýroodaqqa jáne Taıaý Shy­ǵysqa tikeleı shyǵa alady. Bú­gin­­de Qazaqstanda Ázerbaıjan kapı­ta­ly bar 500-den astam kompanııa tir­kelgen. Al Ázerbaıjanda qazaq­stan­dyq kapıtaly bar 145-ke jýyq mekeme jumys isteıdi. О́tken jyly eki el arasyndaǵy taýar aınalymy 332,2 mln dollardy qurady.

Alaıda sarapshylardyń aıtýyn­sha, eki el aýyl sharýashylyǵy salalarynda ózara múddeleri men múmkindikteri bar ekenine qaramastan munaı-gaz, ónerkásiptik kooperasııa, kólik jáne logıstıka, «jasyl energetıkany» damytýda óz áleýetin tolyq iske asyra almady. «Qazirgi geosaıası jaǵdaı kerisinshe bizge neǵurlym tyǵyz saýda-ekonomıkalyq kooperasııanyń qajettigin kórsetip otyr. Álemdik daǵdarys jaǵdaıynda ynty­maqtastyqtyń mańyzdy múmkin­dikterin keıinge qaldyrýǵa bolmaıdy. Osy ýaqytta bizge pikir almasý jáne saraptamalyq deńgeıdegi turaqty baılanystar óte mańyzdy jáne paıdaly. Bizdiń mindetimiz – Qazaq­stan-Ázerbaıjan sarapshylar keńesi aıasynda elderimizdiń basshy­lyǵyna is júzinde nátıje beretin usynys­tar ázirleý», dedi Prezıdent janyndaǵy Qaza­qstan strategııalyq zertteýler ıns­tıtýtynyń dırektory Erkin Tu­qymov. 

Ázerbaıjannyń halyqaralyq qatynastardy taldaý ortalyǵynyń Basqarma tóraǵasy Farıd Shafıev Nur-Sultan men Baký ekijaqty yntymaqtastyqty odan ári damytý úshin úlken áleýetke ıe ekenin aıtty. «Orta dálizdi damytýdyń ma­ńyz­dylyǵyn atap ótkim keledi. Geo­saıası jaǵdaı taýar aınalymyn arttyrýǵa múmkindik beredi. Qazaqstan men Ázerbaıjan kóliktik hab retinde áleýetin kúsheıtýi kerek. Qazirdiń ózinde ártúrli bıýrokratııalyq prosedýralardy jeńildetý boıynsha sharalar qabyldanýda. Kólik baılanystary týraly aıta otyryp, biz tek naqty bir salaǵa qurylǵan keli­sim­derdi ǵana emes, sonymen qatar keń ma­ǵy­nadaǵy baılanystardy, sonyń ishinde talshyqty-optıkalyq, energetıkalyq resýrstardy tasymaldaý sekildi salalardy damytýdy nazarǵa alamyz», dedi F.Shafıev.

Al Májilis depýtaty Aıdos Sarym naqty yntymaqtastyqty damytýdyń ózekti tustaryn erterek qolǵa alyp, zańnamalyq turǵydan bekitý qajet dep sanaıdy. «Shynaıylyq eki eldiń zań shyǵarýshylarynan múlde jańa qarqyndy, belsendilik pen boljamdy sıpattaǵy jańa jumys stılin talap etedi. Parlamentter bir jaǵynan, jańa ınfraqurylym salý, jańa kólik dálizderin qurý jobalaryn jedel qarastyrýǵa jáne ratıfıkasııalaýǵa, ekin­shi jaǵynan, qabyldanǵan keli­simder­diń tıimdi oryndalýyna qoǵam­dyq-parlamenttik baqylaýdy júzege asyrýǵa daıyn bolýy kerek», dedi ol.

О́z kezeginde Talap qoldanbaly zert­teýler ortalyǵynyń dırektory Rahym Oshaqbaev eki el arasyn­daǵy ózara is-qımyl formatyn keńeı­týdi usyndy. «Ázerbaıjan men Qazaq­stan eń úlken ınvestısııalyq áleýeti bar elder retinde ekijaqty yntymaqtastyq sheńberinen shyǵyp, aımaqta tandemdik kóshbasshylyq úlgisin qura alady. Men sondaı-aq jańa tehnologııalyq qurylymdar men sıfrlyq ekojúıelerdiń mańyz­dylyǵyn atap ótkim keledi. Osy turǵyda AHQO ázerbaıjandyq kompa­nııalarǵa ekojúıeni paıdalaný týraly usynys jasaı alady. Bizdiń venchýrlyq kompanııalar úshin ázer­baıjandyq startaptardyń tájirıbesin zertteý qyzyqty bolar edi», degen pikirin bildirdi R.Oshaqbaev.

Keńeste bilim berý máselesi de sóz boldy. Ázerbaıjan Dıplomatııa­lyq aka­demııasynyń prorektory Farız Is­maılzade eki el arasyn­daǵy bilim berý salasyndaǵy yntymaq­tas­tyqtyń keleshegine, sonyń ishinde qos dıplomdyq bilim berý baǵdar­lama­laryn ázirleý, ǵalymdar men zertteý­shilerdiń qysqa merzimdi sapar­laryn uıymdastyrý, sondaı-aq ǵylymı eńbekterdi birlesip basyp shyǵarýdyń joldaryna toqtaldy. Ázerbaıjannyń Mıllı Medjlıs depýtaty Elshad Mırbashıroǵlý eki el arasyndaǵy yntymaqtastyqtyń tabysty bolatynyna senim bildirdi.  Sondaı-aq sóz alǵan Mıllı Medjlıs depýtaty Rasım Mýsabekov eki el arasyndaǵy baýyrlastyq qarym-qatynasta daýly tustar joq, bul kez kelgen salada tabysty ózara is-qımyl jasaýǵa múmkindik beretinin atap ótti.

Negizi keme jasaý, munaı óndirýge arnalǵan qural-jabdyqtardy ón­dirý jáne qubyrlardy tartý eki el arasyn­daǵy nátıjeli júzege asatyn sala­lar bolyp tabylady. Aldaǵy ýaqyt­ta osy baǵyttar boıynsha jobalar qolǵa alynyp, naqty kelissózder júr­gizil­mek.