27 tamyz kúni Ulttyq akademııalyq kitaphananyń konferens-zalynda «Konstıtýsııa. Jańa Qazaqstan. Qarqyndy kadamdar» taqyrybynda dóńgelek ústel ótedi. Oǵan saıası jáne memleket qaıratkerleri, zııaly qaýym ókilderi qatysady. Atap aıtqanda, olar QR Konstıtýsııasyna túzetýler engizýge baılanysty jańa saıası reformalardy talqylaıdy.
Sol kúni saǵat 16:00-de Prezıdent saıabaǵynda tanymal jastar shyǵarmashylyq toptarynyń qatysýymen open-air konserti ótedi. Sahnada jergilikti jáne almatylyq mýzykalyq ujymdar óner kórsetedi.
28 tamyzda Qurmanǵazy eskertkishiniń janyndaǵy alańda «Kúı jármeńkesi» ótedi. Sol kúni saǵat 20:00-de Esil jaǵalaýyndaǵy Amfıteatr sahnasynda «Astana» estradalyq-sımfonııalyq orkestriniń konserti uıymdastyrylady.
Sonymen qatar, 29 tamyz kúni saǵat 17:00 – de elordalyq fılarmonııa qalanyń shyǵarmashylyq ujymdarynyń qatysýymen «Ata Zańym-aıbarym» merekelik konsertine shaqyrady.
30 tamyzda Konstıtýsııa kúnine oraı qalada kásipqoılardyń jáne velosıped sportynyń áýesqoılarynyń qatysýymen jappaı velojarys ótedi. Marshrýt aınalma velojol basynan (Qosshy qalasyna qaraı jol boıymen) «Astana Ormany» JShS velojolyna deıin 20 km quraıdy.
Jarys aıaqtalǵannan keıin márede tirkelgen qatysýshylar arasynda lotereıa jáne baǵaly syılyqtar oınatylady. Sonymen qatar, qala turǵyndary gir sporty, armrestlıng, arqan tartý, asyq atý sııaqty ulttyq sport túrlerinen synǵa túse alady.
Bul mereke kúnderi ótetin jalǵyz sporttyq is-shara emes. Elorda turǵyndary men qonaqtaryn skandınavııalyq júris festıvaline shaqyrady. Ol 30 tamyzda Ortalyq saıabaqtaǵy shańǵy-rollerlik trassada ótedi.
Sonymen qatar, saǵat 15:00–den 22:00-ge deıin «Báıterek» monýmentiniń aldyndaǵy alańda turǵyndar qazaqstandyq estrada juldyzdary óner kórsetetin «Ata Zańym-Báıteregim» konsertine qatysa alady.
«Esil» ózeni jaǵalaýynyń jaıaý júrginshiler bóliginde jáne Demalys Promenade jaıaý júrginshiler kóshesinde Creative Summer jobasy óz baǵdarlamasyn ashady. Kúndizgi baǵdarlama saǵat 14.00-de bastalady jáne balalarǵa arnalǵan oıyn-saýyq baǵdarlamalaryn, fleshmobtardy, anımatorlardyń qoıylymdaryn qamtıdy.
31 tamyz kúni saǵat 13:00-de elordalyq «Sarjaılaý» etnoaýylynda QR Konstıtýsııa kúnine jáne balalar jyly aıasynda qalalyq QHA Analar keńesiniń uıymdastyrýymen balalarǵa arnalǵan «SOS Balalar aýyly»qaıyrymdylyq aksııasy ótedi. Is-shara barysynda balalar etnoaýylǵa saıahat jasaıdy, onda qazaq halqynyń baı tarıhymen, ónerimen jáne dástúrlerimen tanysady, ata-babalarymyz órkenıetiniń etnomádenı ortasyna úńilip, aýyl turmysyna tamsana alady.
Nur-Sultanda Konstıtýsııa kúnine oraı taqyryptyq kórmeler, balalar men oqýshylar úshin elimizdiń Negizgi Zańynyń tarıhy men halyq úshin mańyzy týraly tanymdyq saǵattar ótkiziledi. О́zge is-sharalardyń ishinde halyqtyń, ásirese jastardyń quqyqtyq saýattylyǵyn arttyrýǵa baǵyttalǵan QR Konstıtýsııasynyń normalary men zańdaryn bilýge arnalǵan zııatkerlik konkýrstardy, sondaı-aq turǵyn úı alaptaryndaǵy konsertterdi atap ótýge bolady.
Jalpy, Konstıtýsııa kúnin merekeleýge arnalǵan barlyq is-sharalar qoǵamnyń Táýelsizdik qundylyqtarynyń aınalasyna shoǵyrlanýyna, árbir qazaqstandyqtyń jańa Qazaqstan qurý ıdeıasyna azamattyq qatysý sezimin nyǵaıtýǵa jáne elorda halqynyń quqyqtyq mádenıetin arttyrýǵa yqpal etedi.
