Sahnada Marjan Arapbaeva, Beıbit Qorǵan, Mádı Qadyrov, Ǵadilbek Janaı, sondaı-aq «Azııa», «Zaman» jáne Kesh You toptary jáne ózge de ánshiler óner kórsetti. Kórermen qaýym alańǵa konsert bastalmaı turyp jınaldy, olar bı bılep, súıikti ánshilerimen birge án aıtty.
«Qala turǵyndaryn merekemen quttyqtaımyz! Eldiń egemendigin nyǵaıtqan Konstıtýsııa – Qazaqstan halqy úshin mańyzdy qujat. Sondaı-aq búgin biz taǵy bir erekshe kúndi atap ótemiz. Táýelsiz Qazaqstannyń arhıtektýralyq sımvolyna aınalǵan «Báıterek» monýmentiniń ashylǵanyna 20 jyl boldy», dedi Nur-Sultan qalasynyń mádenıet basqarmasy bólim basshysynyń mindetin atqarýshy Naýryzbek Nasyr.
Elorda turǵyndary men qonaqtary da bir-birin Konstıtýsııa kúnimen quttyqtady.
«Konsertten lázzat alý úshin otbasymyzben birge «Báıterek» alańyna arnaıy keldik. Merekelik kesh bizge jaǵymdy kóńil-kúı syılady. Elimizde árdaıym beıbitshilik pen amandyq bolsyn», dedi elorda turǵyny О́temis Qojabaev.
