Sheteldik jýrnalıster qyzyǵýshylyǵy joǵary

Jalpy saraptap aıtatyn bolsaq, baı­qaýda úzdik dep tanylǵan shetel jýr­nalısteri elimizde júrgizilip jatqan refor­malar men «Jańa Qazaqstan» tujyrym­damasy, Prezıdent Q.Toqaevtyń halyqqa Jol­daýynyń mazmuny jáne AО́SShK al­tynshy sammıti sekildi eldegi mańyzdy is-sharalar týraly habardar. Eldiń syrt­qy saıasaty týraly da paıymdary salmaqty.

Syrtqy ister mınıstriniń orynbasary Roman Vasılenkonyń aıtýynsha, jyl saıyn uıymdastyrylatyn baıqaýǵa sheteldik BAQ ókilderiniń qatysý qarqyny men qy­zyǵýshylyǵy artyp keledi. Osy jy­ly álemniń 40 elinen 50-den astam sa­­raptamalyq materıal qabyldanǵan. She­tel­dik jýrnalısterdiń basym bóligi «Ja­ńa Qa­zaqstan» aıasynda ekonomıkalyq já­ne áleý­mettik reformalar taqyrybyn qozǵaǵan.

Brıtandyq bloger Trıstan Hıýzdyń The Ancients/«Ejelgi Qazaqstan: Uly da­lanyń altyny» podkasty, grýzın saıasattanýshysy, jýrnalıst Gúlbaat Rshıladzeniń Qa­zaqstan men Grýzııa arasyndaǵy tarıhı baılanystar taqyrybyndaǵy maqa­lasy, AQSh jýrnalısi Donovan Makken­zıdiń Ottawa Life Magazine jýrnalyn­da jarııalaǵan maqalasy, The Korea Herald kúndelikti gazetiniń tilshisi Sanjaı Ký­mardyń maqalasy, Marokkonyń Le Matin jáne 12.ma basylymdarynyń tilshisi Drıss Lıakýbı jáne ANKASAM-nyń Ortalyq Azııa máseleleri jónindegi túrik sarapshysy Emraz Kaınnyń jarııalanymdary joǵary baǵalanyp, konkýrs jeńimpazy atandy. Sondaı-aq «Týrızm» nomınasııasy bo­ıynsha Kýveıtten kelgen trevel-bloger Halıd Almýtaırı el týrızmin joǵary deńgeıde nasıhattaǵany úshin jeńiske laıyq dep tanyldy. Atalǵan bloger, jýrnalıster Qazaqstanǵa kelip, Nur-Sultan, Býrabaı, Túrkistan jáne Almatymen tanysty. Sol kezde elde ótip jatqan Álemdik jáne dástúrli dinder kóshbasshylarynyń VII sezine arnalǵan is-sharalarǵa qatysýǵa múmkindik aldy.

«Qazirgi ýaqytta jýrnalıster qoǵamdyq dıplomattar bolyp tabylady. Halyqtar men elder arasyndaǵy senim azaıdy, sondyqtan kásibı jýrnalıstıkanyń róli bizdiń zamanymyzda erekshe mańyzdy. Sheteldik jýrnalısterdiń bizdiń elge degen qyzyǵýshylyǵynyń artýy qýantady. 2014 jyldan bastap beriletin ótinimder sany ǵana emes, sonymen qatar qozǵalatyn taqyryptar aýqymy da ósti, atap aıtqanda týrızmnen qoǵamdyq-saıası máselelerge deıingi barlyq taqyryptar qamtyldy», dedi jeńimpazdardy marapattaý jıynynda Bas redaktorlar klýbynyń prezıdenti Bıbigúl Jeksenbaı. Al Kazakh Tourism Ult­tyq kompanııasy AQ Basqarýshy dırek­tory Danıel Serjanuly: «Bul baı­qaý­da «Týrızm» nomınasııasynyń qosy­lýy kezdeısoq bola qoıǵan joq. Elimiz atal­ǵan salany damytý maqsatynda birneshe baǵyt­ boıynsha jumys júrgizýde. Kýveıt tilshisiniń elimizdiń týrızm salasy týraly ja­ryqqa shyqqan elektrondy jolsiltemesi arab elderinen keletin týrıster sanynyń artýyna septigin tıgizedi degen úmittemin», dedi.