Ulttyq ekonomıka mınıstri Álibek Qýantyrovtyń málimdeýinshe, 2021 jyly ulttyq joba aıasynda 48,8 myń jobaǵa memlekettik qoldaý kórsetildi, qyzmet kórsetý jáne óńdeý ónerkásibi salalarynda jańa bıznes-ıdeıalardy iske asyrý úshin 984 jobaǵa granttar berildi. Budan basqa, 33,4 myń adam kásipkerlik negizderin oqydy jáne 169 myńnan astam ShOB sýbektileri bıznes ashý jáne ony júrgizý boıynsha konsýltasııalyq qyzmetter aldy.
Jyl qorytyndysy boıynsha ulttyq jobanyń is-sharalaryn iske asyrý arqasynda 320 myń jańa jumys orny quryldy (jospar – 196 myń), 814 myń adamdy jumysqa ornalastyrýǵa kómek kórsetildi (jospar – 700 myń). Sonymen qatar tabysy eń tómengi kúnkóris deńgeıinen nashar aýyl halqynyń úlesi tómendedi, ShOB-tyń JIО́-ge úlesi ósti, al ekonomıkadaǵy memlekettik sektordyń úlesi 14,5%-ǵa deıin tómendedi.
Osy másele boıynsha «Atameken» UKP tóralqasynyń tóraǵasy Raıymbek Batalov, Pavlodar oblysynyń ákimi Ábilqaıyr Sqaqov, Aqtóbe oblysynyń ákimi Eraly Toǵjanov, sondaı-aq Shymkent qalasy ákiminiń orynbasary Aıbek Sattybaev baıandama jasady.
«Basty maqsat – halyqty jumyspen qamtyp, kásipkerlik sýbektileriniń bárine birdeı, teń jaǵdaı jasaý. Bul úshin memleket bıznesti júrgizýdiń ashyq jáne túsinikti erejelerin qabyldap otyr», dedi Álıhan Smaıylov.
Sonymen qatar Úkimet basshysy Úkimettiń «Atameken» palatasymen birlesip, kásipkerlik qyzmet salasyna jańa retteý saıasatyn engizý boıynsha aýqymdy jumys atqaryp jatqanyn eske saldy. Atap aıtqanda, adamı faktorlardyń áserin barynsha azaıtý úshin memlekettik baqylaýda táýekelderdi basqarý jáne baǵalaý júıesin avtomattandyrý boıynsha keshendi sharalar qabyldanýda.
«Reformany taza paraqtan bastap júzege asyrý bıznes-ortany retteýdiń tıimdiligin arttyryp, kásipkerlerge qolaıly jaǵdaılar jasaıdy», dedi Premer-Mınıstr.
Onyń aıtýynsha, bıyl shaǵyn jáne orta bıznestiń jalpy ishki ónimdegi úlesi 33,5%-ǵa jetti. Kásipkerlik sýbektileriniń sany – 1,4 mln. Shaǵyn jáne orta bızneste jumyspen qamtylǵandardyń jalpy sany 3,5 mln adamdy qurap otyr.
«Bizdiń maqsatymyz – kásipkerlerdiń múmkindikterin keńeıtý maqsatynda osy baǵyttaǵy sapaly ózgeristerge qol jetkizý. Ulttyq jobany iske asyrý 2025 jylǵa qaraı shaǵyn jáne orta bıznestiń jalpy ishki ónimdegi úlesin 35%-ǵa deıin ulǵaıtýǵa, 1 mln-ǵa jýyq jumys ornyn qurýǵa jáne memlekettiń ekonomıkadaǵy úlesin 14%-ǵa deıin azaıtýǵa múmkindik berýi tıis», dedi Álıhan Smaıylov.
Bul oraıda ulttyq jobanyń kórsetkishterine sapaly jáne ýaqytyly qol jetkizýdi qamtamasyz etý úshin Premer-Mınıstr bızneske arnalǵan qarsy mindettemelerdi eskere otyryp, ulttyq jobanyń barlyq baǵyttary boıynsha memlekettik qoldaý sharalarynyń tıimdiligin arttyrýdy tapsyrdy.
«Kásipkerlerden jańa jumys oryndarynyń ashylýyn, turaqty jalaqynyń, zeınetaqy jarnalary men salyqtardyń ýaqytymen tólenýin, shyǵarylatyn ónim túrleriniń kóbeıýin kútemiz», dedi Á.Smaıylov.
Odan bólek, ákimdikterge kásip asham degen azamattarǵa jan-jaqty qoldaý kórsetý tapsyryldy: elektrmen, sýmen, jylýmen qamtamasyz etý, jol salý máseleleri boıynsha jedel sheshim qabyldaý kerek. Ulttyq ekonomıka mınıstrligi men «Atameken» palatasyna bızneske túsetin ákimshilik júktemeni azaıtý jumystaryn jalǵastyrý, sondaı-aq bızneske arnalǵan mindetti talaptardy, onyń ishinde jańadan engiziletin talaptardy da qaıta qaraý tapsyryldy.
«Memleket bıznestiń turaqty jáne tabysty qyzmetine múddeli. Kásipkerler osyny naqty sezinýleri kerek», dep túıindedi Premer-Mınıstr.
