Osy oraıda zańgerler qaýymdastyǵy «Adal saılaý úshin» shtabyn quryp, saılaý naýqany kezinde konstıtýsııalyq reforma, Prezıdent saılaýynyń erejelerin zań turǵysynan túsindirip, halyqqa quqyqtyq qoldaý kórsetýdi maqsat etip otyr.
«Prezıdent saılaýy týraly konstıtýsııalyq zańdar boıynsha azamattarymyzdyń suraqtaryna jaýap berýge daıynbyz. Olar bizdiń Qazaqstan zańgerler odaǵynyń saıty arqyly suraqtaryn joldaı alady. Barlyq saýal jaýapsyz qalmaıdy, ýaqytpen sanaspaı jumys isteımiz. Sonymen qatar Zańgerler odaǵy barlyq zańgerdi, tipti odaq quramyna kirmeıtinderdi de osy jumysqa belsene aralasýǵa, ıaǵnı Prezıdent saılaýy týraly zańdy halyqqa barynsha keń aýqymda túsindirýge shaqyrady. Bul – bizdiń basty mindetimiz», dedi «Qazaqstan zańgerler odaǵy» RQB tóraǵasy, zań ǵylymdarynyń kandıdaty, professor Serik Aqylbaı.
Arnaıy shtabtyń quramynda ázirge 7 adam bar, shtab tóraǵasy bolyp S.Aqylbaı saılanǵan. Sondaı-aq barlyq oblys ortalyqtarynda shtab ókildikteri qurylady. «Adal saılaý úshin» shtaby – memleket menshiginde tirkelmegen qoǵamdyq uıym. «Biz halyq saılaýǵa qatysty quqyǵyn bilse deımiz. Saılaýdyń jalpy zańǵa saı ótý joldaryn, talaptaryn qarapaıym tilmen jetkizemiz, túsindiremiz», dep qosty shtab tóraǵasy.
«Adal saılaý úshin» shtabynyń ókilderi baıqaýshylar, saılaý komıssııasynyń músheleri jáne quqyq qorǵaý organdarynyń ókilderine saılaý ótkizý rásimderi týraly ádistemelik nusqaýlyqtar daıyndaıdy. Buǵan qosa saılaý qorytyndylary boıynsha baıqaýshylarǵa quqyqtyq kómek kórsetýdi qosa alǵanda, olardyń shtabyna zańdy qoldaý kórsetemiz», dedi zań ǵylymdarynyń doktory, professor, odaq múshesi Indıra Áýbákirova.
