Mysaly, jaqynda Astanada Almaty oblysynyń aýylsharýashylyq taýarlarynyń jármeńkesi ótken-di. Jalpy, elordadaǵy jármeńkege Almaty oblysynan et, sút jáne kókónis pen jemister jetkizilgen bolatyn. Sonda oblystyń barlyq aýdanynan qyryqtan astam ónim óndirýshiler bas qala turǵyndary men qonaqtaryna qajetti ónimderin usyndy.
– Almaty oblysynyń aýyl sharýashylyǵy taýarlarynyń jármeńkesi ótedi degen soń «Astana Arena» alańyna arnaıy keldim. Qalalyqtar úshin tabıǵı ónim altynǵa teń. Jeri qunarly, shóbi shúıgin mekenniń ónimderiniń ózindik ereksheligi bar. Ásirese etin aıtsańyzshy. Baqanastyń etiniń dámin tatyp kórgen adam retinde onyń tiske jumsaq, dámi til úıiretinin senimmen aıta alamyn. Balyǵy týraly sóz basqa. Sonymen qatar ulttyq taǵamymyz – qurt, irimshikti de ańsap júrgen edik. Ony da osy jármeńkede aldym. Baǵa qoljetimdi, qaltaǵa salmaq salmaıdy. Jalpy, Astana tórine osyndaı tabıǵı ónim ákelgenderi úshin alǵysym sheksiz, – degen edi sol kezde jármeńkege kelgen astanalyq Nurgúl Dálelhan.
Aıtpaqshy, osy jármeńkede Alataý baýraıynda ósken almaǵa suranys óte joǵary boldy. Turǵyndardyń basym kópshiligi dál osy tabıǵı jemisti kóptep satyp aldy.
– Bul almanyń ıisiniń ózi muryndy jarady. Satyp alýǵa barǵanda alýshylarǵa dámin tatýǵa bergenin kórdim. Men de almanyń dámin tattym. Endi onyń táttiligin sózben aıtyp jetkize almaımyn. Birden kóp mólsherde satyp aldym. Qysqa dárýmen bolatyn boldy, – deıdi óz tilegin bildirgen taǵy bir astanalyq turǵyn Dárigúl Qosjanova.
Jalpy, Almaty oblysynda ósetin almanyń derligi Eńbekshiqazaq, Jambyl, Qarasaı jáne Uıǵyr aýdandarynyń enshisinde. Máselen, Eńbekshiqazaq aýdanyndaǵy Unifruit seriktestigi bul ispen 2016 jyldan bastap aınalysady. Jemis-jıdekterdiń kóshetin shetelden aldyrǵan. Qazir baý-baqshada Italııadan arnaıy jetkizilgen kóshetter máýelep tur. Seriktestik daıyn ónimdi saqtaýǵa da basa mán beredi. 2018 jyly 4 200 tonna jemis saqtaýǵa qaýqarly qoıma salsa, 2019 jyly suryptaý jelisin iske qosqan. Jobanyń jalpy quny shamamen 3,3 mlrd teńgeni quraıdy. Igi sharýa arqyly 47 turaqty jáne 70 maýsymdyq jumys orny quryldy. Al óndiris kólemi jylyna 5 myń tonna ónimdi quraıdy.
Jambyl aýdanyndaǵy «Atek Agro» seriktestigi jyl saıyn 54 gektar jerge egilgen baqtan mol ónim alady. Almanyń «Pınk ledı», «Fýdjı», «Grennı smıt», «Gala», «Golden delıshes» sııaqty tanymal suryptary shyqqan shyǵyndy óteıtindeı jemis berdi. Alma baǵyna tamshylatyp sýarý ádisin qoldanýdy tájirıbege engizgenine biraz jyl boldy. Budan ónimdilik artyp, shyǵyn azaıǵan.
Uıǵyr aýdanyndaǵy Alma Prodex seriktestiginiń baǵyndaǵy jemis te jaqsy nátıje berýde. Atalǵan sharýashylyqta 25 gektardan astam alma baǵy bar. Onda almanyń «Golden Delıshes», «Fýdzı», «Brebýren», «Florına», «Gala», «Grenı Smıtt», «Red Chıf» sııaqty joǵary ónim beretin tanymal sorttary ósiriledi.
Almaty oblysy
