Qaıyrbek О́skenbaev Memleket basshysy Qasym-Jomart Toqaevtyń tapsyrmasyna sáıkes jáne Transkaspıı kólik marshrýtyn damytý turǵysyndaǵy mindetterge oraı IIDM óńirdegi teńiz porttarynyń ınfraqurylymyn keńeıtý baǵytynda birqatar naqty jumysty júrgizýde.
Qazirgi kúnde Aqtaý porty aılaǵyn keńeıtý jáne Quryq portyndaǵy parom kesheni qurylysy jobalary sátti júzege asyryldy. Bul óz kezeginde Kaspıı mańyndaǵy elder men Transkaspıı halyqaralyq kólik baǵdary jáne «Soltústik-Ońtústik» marshrýty boıynsha júk tasymaly aǵynyn arttyrýǵa zor septigin tıgizdi. Búginde qazaqstandyq Aqtaý jáne Quryq porttarynyń jyldyq júk tıeý kólemi 21 mln tonnany quraıdy.
Atalǵan porttardy odan ármen damytý maqsatynda mınıstrlik birqatar ınfraqurylymdyq jobany júzege asyrýdy kózdep otyr. Atap aıtqanda, 2025 jylǵa qaraı Aqtaý teńiz portynda konteınerlik hab qurylmaq.
«Strategııalyq mańyzy zor joba «Qýatty óńirler – el damýynyń draıveri» ulttyq jobasyna engizilgen. Jobanyń tartymdylyǵyn arttyrý úshin ol «Aqtaý teńiz porty» arnaıy ekonomıkalyq aımaǵynda sheteldik ınvestorlarmen birlesken kásiporyn formatynda iske asyrylmaq. Jobanyń jalpy quny – 13,7 mlrd teńge. Habty 2025 jylǵa qaraı iske qosý josparlanǵan. Joba konteınerlik júk tasymalynyń kólemin jylyna 40 myń jıyrma fýnttyq balamadan 215 myńǵa deıin arttyrmaq», dedi Qaıyrbek О́skenbaev.
Sondaı-aq vedomstvo basshysy porttyq ınfraqurylymdy damytý aıasynda 2025 jylǵa qaraı Quryq porty mańynda «Sarja» kópfýnksıonaldy teńiz termınaly qurylysy josparlanyp otyrǵanyn jetkizdi. Atalǵan joba astyq saqtaıtyn jáne ámbebap maqsattaǵy, sondaı-aq kólemdi júk termınaldary men kólik-logıstıkalyq ortalyǵynyń qurylysyn qamtıdy. Teńiz termınaly elimizdegi porttardyń júk tıeý múmkindigin qosymsha 9,4 mln tonnaǵa deıin arttyrmaq.
«Jobalar jeke ınvestısııalar esebinen júzege asyrylady. Eger de sizder taraptan jobaǵa qyzyǵýshylyq týyndasa, biz qandaı da bir usynystaryńyzdy qarastyrýǵa nıettimiz», dep atap ótti mınıstr.
Sonymen qatar ol Birikken Arab Ámirlikteri Qazaqstannyń saýda-ekonomıkalyq salasyndaǵy negizgi strategııalyq áriptesiniń biri ekendigine nazar aýdaryp, Mohammed Jýma Al Shamısıdiń elimizge sapary memleketter arasyndaǵy yntymaqtastyqty odan ármen arttyrýǵa serpin beretindigine senim bildirdi.
Taǵy bir aıta keterligi, is-sapar aıasynda Abu Dhabi Ports Group basqarýshy dırektory Aqtaý jáne Quryq porttaryna arnaıy baryp, onda atqarylyp jatqan jumystarmen tanysty.
