Qasym-Jomart Toqaev Túrkııa Prezıdentin elin alǵa bastap kele jatqan naǵyz kóshbasshy dep atady.
«Sizdiń syndarly saıasatyńyzdyń arqasynda Túrkııanyń álemdegi abyroı-bedeli arta tústi. Elińizdi dúnıejúzi áleýeti zor, damyǵan memleket retinde biledi, qurmetteıdi. Túrkııa – bizdiń ejelden enshisi bir, tamyrlas týysymyz. Sondaı-aq Qazaqstannyń eń jaqyn ári senimdi strategııalyq seriktesi», dedi Memleket basshysy.
Qazaqstan Prezıdentiniń aıtýynsha, qos halyqtyń arasyndaǵy baýyrlastyq baılanys – ózara tıimdi qarym-qatynastyń altyn dińgegi. Bul iske Rejep Taııp Erdoǵan orasan zor úles qosyp keledi.
«Men ony joǵary baǵalaımyn. Ásirese, týysqan elderdi ortaq múddege uıystyryp, tamyrymyzdy tereńdetý úshin erekshe eńbek sińirip júrsiz. Bastapqyda keńes retinde qurylyp, búginde tolyqqandy uıymǵa aınalǵan Túrki memleketteri uıymy – osynyń aıqyn dáleli. Odan bólek, bitimgershilik rólińizdi erekshe atap ótkim keledi. Biz sizdiń dúnıejúzindegi daǵdarystar men aımaqtaǵy máselelerdi sheshý jolyndaǵy bastamalaryńyzdy qoldaımyz», dedi Qasym-Jomart Toqaev.
Memleket basshysy Qazaqstan Túrkııamen strategııalyq áriptestikke negizdelgen kópqyrly yntymaqtastyqty nyǵaıtýǵa múddeli ekenin aıtyp, bolashaqqa birge qadam basatynyn atap ótti.
«Osy joldaǵy máńgi dostyǵymyz ben myzǵymas baýyrlastyǵymyz jalǵasa beredi. Siz qazaq-túrik qatynasyn turaqty damytýǵa ólsheýsiz úles qosyp kelesiz. Men osy saladaǵy aıryqsha tarıhı rólińizdi eskere otyryp, Sizdi I dárejeli «Dostyq» ordenimen marapattaý týraly sheshim qabyldadym. Bul sheshim ekijaqty qarym-qatynastar jylnamasyna altyn árippen jazylary sózsiz. Men dostyǵymyzdy nyǵaıtyp, bereke-birligimizdi arttyra túsý úshin bar kúsh-jigerimdi jumsaýǵa daıynmyn», dedi Prezıdent.
