Darynymen daralanǵan alty jasar qyz bul óner báıgesine «Alashorda» atty kartınalar toptamasyn usynypty. Bularda jıyrmasynshy ǵasyrdaǵy qazaq zııalylarynyń jarqyn beıneleri kórinis tapqan.
Kádeli konkýrsqa túsken týyndylardy álemniń ár shalǵaıynan kelgen 58 qazylar alqasy sarapqa salypty. Aıy ońynan týǵan Aısha talanttar taıtalasynda top jaryp qana qoımaı, úzdikter úkilengen prodıýserlik katalogke da enipti.
Aıta ketetin jaıt, Aıshanyń sýreti boıynsha Álıhan Bókeıhan, Ahmet Baıtursynuly, Mirjaqyp Dýlatov sekildi Alash arystary sheteldik VOGUE jýrnalynyń muqabasynda beınelengen. Bir qyzyǵy, qııaly júırik qylqalam sheberi keıipkerleriniń ústine qazirgi tańda ekiniń biri taba almaıtyn sándi kostıýmder «kıgizipti». Ol óziniń bul sýretterin áleýmettik jeli arqyly tórtkúl dúnıege tegis taratyp úlgeripti.
Anasynyń aıtýynsha, Aısha bes jasynan bastap sýret salýmen áýestenip, on ekige tolǵanda kenepke peızajdar men kelisti portretter jazyp ájeptáýir mashyqtanǵan kórinedi.
«Alaqanǵa salyp aıalaǵan Aıshamyz qarshadaı kezinde qant dıabetimen aýyryp, úı-ishimizben qatty ýaıymdadyq. Ári-sári kúıden áıteýir shyqtyq-aý. Birde Astanaǵa toıǵa bardyq. Sol joly kúıeý balamyz bizdi mýzeıge apardy. Kóz qýantar kórmeniń ústinen tústik. Qyzymyz ekspozısııaǵa qoıylǵan kartınalarǵa telmire qarap uzaq turdy. Sodan keıin-aq ol talaptyń taı júırigin erttep minip, óner jolyna birjola bet burdy», deıdi anasy aǵynan jarylyp.
Býyrqanǵan boıaýlar syryna qanyqqan qabiletti boıjetken budan keıin kóptegen baıqaýǵa qatysyp, qaptaǵan júldeni qanjyǵasyna baılady. Egıpet, Bolgarııa, Kolýmbııa jáne basqa elderde osy salanyń maıyn ishken marǵasqalardan maqtaý estidi.
Bolashaǵynan úlken úmit kúttiretin óreli órenimiz ónersúıer qaýymǵa Assol esimimen tanymal ıllıýstrator-grafık otandasymyzdy ózine úlgi tutady. Oǵan tipti eshkimdi teńgermeıdi.
Eń bastysy, balǵyn sýretshi týǵan eliniń tarıhyna qatty qyzyǵady, halqyn súıedi. Alashshyl atalarynyń sýretin salyp, Albıon tórinde asqaqtatýynyń túp sebebi, sirá sonda bolsa kerek.
