Shart jobasyn daıyndaýdaǵy belsendilik

Prezıdent janyndaǵy Ortalyq kommýnıkasııalar qyzmetinde dástúrli brıfıng ótti. Basqosýǵa  Ulttyq kásipkerler palatasy basqarma tóraǵasynyń orynbasary Rahym Oshaqbaev keldi. «Úkimet qazaqstandyq bıznes-qaýymdastyqqa EAEO-ǵa qatysty kelissózder úderisine qatysýǵa jáne onyń ártúrli bólimderi boıynsha  Qazaqstannyń ustanymyn bildirýge  tolyq múmkindik bergenin atap ótken jón. О́tken jyldyń qarashasynan bas­tap shart mátininiń aǵymdaǵy redaksııa­lary Ulttyq palataǵa kelip jatty, biz bıznesti maksımaldy túrde eliktirýdi qamtamasyz etý úshin olardy birden saıtqa jarııalap otyrdyq. Barlyǵy alty redaksııa jarııalandy. Qazir bizdiń palata.kz saıtymyzdan 29 mamyrda memleket basshylarynyń qol qoıýyna jiberiledi dep boljanyp otyrǵan qujattyń 2014 jylǵy 15 mamyrdaǵy sońǵy nusqasyn júktep alýyńyzǵa bolady. Ol barlyq qazaqstandyq kásipkerlerge qujatty zerttep, bizge óz usynystaryn jiberýge múmkindik berdi», dedi  Ulttyq kásipkerler palatasy basqarma tóraǵasynyń orynbasary R.Oshaqbaev. Jiberilgen eskertýler men usynystardyń qorytyndysy boıynsha  Ulttyq palatada qaýymdastyqtardy, sarapshylardyń, beınekonferensııalar arqyly qosylǵan óńirlik kásipkerlerdiń  otyzdan asa jumys keńesteri ótkizilip, Sharttyń ártúrli bólimderi talqylanǵan. Túrli sharalarǵa, sonyń ishinde  EEK  Keńesiniń otyrystarynyń daıyndyqtary men  Astana, Máskeý jáne Mınsk qalalaryndaǵy sarapshy toptar otyrystaryna qatysqan. Sharttyń barlyq bólimderi boıynsha Qazaqstannyń kásipkerlik qaýymdastyǵynyń pozısııalary jazylyp, árdaıym ókiletti memlekettik organdarǵa jetkizilip otyrǵan. Jalpy Palata Úkimetke resmı túrde 120-dan asa eskertýler men usynystar jibergen. Nátıjesinde shamamen 90 paıyzy, ıaǵnı bıznes usynystarynyń basym kópshiligi qazaqstandyq kelissózder tobynyń resmı ustanymy bolyp, shart jobasynyń qorytyndy redaksııasyna engizildi. Úkimet Ulttyq palatanyń ókilderine kelissózderge qatysýǵa jáne shart baptarynyń redaksııalaryn jasaýda saraptyq deńgeıde tikeleı jumys isteýge múmkindik berdi. «Sonymen qatar biz bıznes qaýymdastyqtyń kelissózderge qatysý úderisin maksımaldy ashyq ótkizip, ony kópshilikke túsindirýge tyrystyq. 2013 jyldyń qarasha aıynan bastap shart jobasyn talqylaý aıasynda  palata BAQ-qa kelissózder úderisiniń qandaı da bir bólimderi boıynsha jaǵdaı týraly málimdeıtin 170-ten asa materıaldy, joǵaryda aıtylǵan sharttyń 6 redaksııa­synan ózge 75 jańalyqty jarııalady», degen tóraǵa orynbasary Úkimettiń bıznes qaýymdastyqqa  EAEO zańnamasyn qalyptastyrýǵa qatysý boıynsha bergen múmkindikteriniń teńdessiz ekendigin de nazardan tys qaldyrmady. «Salystyra alǵanda reseılik te, belarýstyq ta bıznes qaýymdastyqtarynyń eldiń pozısııasyn qalyptastyrýǵa qatysý týraly aıtpaǵanda, tipti sharttyń ózekti nusqalary da joq. Bul eskerýsiz qalmady, biz reseılik bedeldi qoǵamdastyqtardan, mysaly, Reseı ónerkásipshileri men kásipkerleri odaǵynan shartpen jumys isteý kezinde bıznes múddelerin eskerý ótinishin aldyq. Jalpy, qazaqstandyq tarap kelissózder barysynda birinshi vıse-premer Baqytjan Saǵyntaevtyń jetekshiligimen bıznes qaýymdastyqtyń usynystarynyń basym kópshiligin qorǵap qalǵandyqtan, shartqa qatysty rızalyǵymyzdy bildiremiz», dedi ol. Ábdirahman QYDYRBEK, «Egemen Qazaqstan».