Qaraǵandy qalasynyń «Shańyraq» kópbalaly otbasylardy qoldaý ortalyǵynda uıymdastyrylǵan kezdesý barysynda Q.Ábden óziniń saılaýaldy baǵdarlamasynyń tanystyrylymyn ótkizdi. Kezdesýge Qaraǵandy oblysynan 100-ge jýyq kópbalaly ana jınalǵan. Turǵyndar otbasy qundylyqtaryna qatysty máselelerdi kóterip, rýhanı, mádenı-áleýmettik damý tóńireginde suraq qoıyp, naqty ótinishteri men usynystaryn jetkizdi.
«Búgingi kezdesýde Qaraqat Ábdenmen qoǵamdaǵy ózekti máselelerdi talqyladyq. О́zimizdeı kópbalaly ári ulttyq qundylyqtardy nasıhattap júrgen ananyń prezıdenttikke úmitker bolyp, el bolashaǵy úshin eńbek etip júrgeni biz úshin úlken qýanysh», dep bólisti kópbalaly analardyń biri Sandýǵash Qulmaqova.
Saılaýaldy shtabynyń baspasóz qyzmeti málimdegendeı, budan buryn Qaraqat Ábden Astana mańyndaǵy Qosshy qalasy men Qoıandy aýylynyń turǵyndarymen de kezdesý ótkizgen.
Eske salsaq, Qazaqstan Prezıdentin kezekten tys saılaý 20 qarasha kúni ótedi.
