Kezdesý barysynda Qazaqstan men Qyrǵyzstan arasyndaǵy mádenı-gýmanıtarlyq baılanystardy odan ári damytý, ózara yntymaqtastyq aıasyn keńeıtý máseleleri talqylandy.
Erlan Qarın sońǵy jyldary eki eldiń kóptegen mádenı jáne ǵylymı jobalardy birlesip júzege asyryp jatqanyn aıtty. Munyń barlyǵy qazaq-qyrǵyz qarym-qatynastarynyń erekshe sıpatyn jáne bizdiń Qyrǵyzstanmen strategııalyq seriktestikti nyǵaıtýǵa nıetti ekenimizdi kórsetetinin jetkizdi.
Sonymen qatar, QR Memlekettik keńesshisi Prezıdent Qasym-Jomart Toqaevtyń bastamasymen júzege asyrylyp jatqan saıası reformalardyń máni men mańyzyna toqtaldy. Onyń ishinde, Konstıtýsııalyq reformalardyń ereksheligi, respýblıkalyq referendým qorytyndylary, aldaǵy saılaýlardyń mazmuny jaıynda atap ótti.
Sýıýnbek Kasmambetov Qyrǵyzstan tarapy Qazaqstanda atqarylyp jatqan saıası reformalardy joǵary baǵalaıtynyn jáne olardyń sátti júzege asýyna tilektes ekenderin jetkizgen.
Qyrǵyz Respýblıkasynyń Memlekettik hatshysy Abaı Qunanbaıulynyń 175 jyldyq jáne Muhtar Áýezovtiń 125 jyldyq mereıtoılary kórshiles elde keń kólemde atalyp ótkenin aıtty. Budan bólek bıyl qazaq-qyrǵyz ónerpazdarynyń qatysýymen 19 iri is-shara uıymdastyrylyp, eki eldiń mádenı baılanysynyń nyǵaıa túskenin atap ótti.
