Bort_01
Prezıdent TMD elderi delegasııalarynyń basshylaryna iltıpat bildire otyryp, ekonomıkalyq seriktestikti keńeıtý úshin jaǵdaı jasaýdyń mańyzdylyǵyn aıtty.
«Jýyrda TMD-ǵa múshe elderdiń basshylarynyń Sammıti ótti. Biz ózara yntymaqtastyqty arttyrýǵa, ekonomıkanyń áleýetin nyǵaıtýǵa degen ortaq nıetimizdi bildirdik», dedi Memleket basshysy.
Qasym-Jomart Toqaev shıelenise túsken geosaıası qaıshylyqtarǵa, álemdik ekonomıkadaǵy turaqsyzdyqqa nazar aýdara otyryp, birqatar tıimdi shara qabyldaýǵa shaqyrdy.
«Bul rette ózara saýda-ekonomıkalyq yntymaqtastyq mańyzdy ról atqarady. О́zderińizge málim, Qazaqstannyń bıylǵy tóraǵalyǵy aıasynda TMD-nyń 2030 jylǵa deıingi ekonomıkalyq damý strategııasynyń mindetterin belsendi júzege asyrý isi jalǵasty. Halyqaralyq naryqtaǵy daǵdarys jaǵdaıyna qaramastan, ekonomıkamyz birtindep qalpyna kele bastady», dedi Prezıdent.
Memleket basshysy kedergilerdi joıýǵa, proteksıonızmge jol bermeýge, qolaıly tarıftik shart qalyptastyrýǵa, ákimshilik rásimderdi jeńildetýge shaqyrdy.
Qasym-Jomart Toqaev óz sózinde kólik-tranzıt áleýetin damytý máselelerine de toqtaldy. Atap aıtqanda, Eýrazııa naryqtaryna jańa múmkindikter ashatyn Transkaspıı halyqaralyq kólik baǵytynyń keleshegi bar ekenin jetkizdi.
«Bul máseleniń ózektiligi artyp keledi. TMD-ǵa múshe memleketter qolda bar áleýetti damytý úshin birlesip jumys isteıtin bolady. Atap aıtqanda, Iranǵa, Parsy shyǵanaǵy men Úndistanǵa shyǵatyn «Soltústik – Ońtústik» baǵyty boıynsha saýda-sattyqty órkendetý mańyzdy», dedi Prezıdent.
Sóz sońynda Astanada ótip jatqan TMD úkimetteri basshylary keńesiniń otyrysy bul - Dostastyqqa múshe elderdiń aldynda turǵan mindetterdi sheshýge óz úlesin qosatynyna senim bildirdi.
