Qazaqstannyń tóraǵalyǵy aıasynda barlyq basym baǵyttardaǵy yntymaqtastyqty tereńdetý boıynsha naqty jumys júrgizildi. Atap aıtqanda, saýda-ekonomıka salasyna basty nazar aýdaryldy.
Úkimet basshysy TMD sheńberinde qabyldanǵan Týyndaıtyn problemalarǵa birlesip den qoıý sharalary tizbesiniń mańyzyn atap ótti. Ol ózara ınvestısııalardy yntalandyrýdy, ónerkásip kooperasııasyn tereńdetýdi, kedendik retteýdi jeńildetýdi, jańa logıstıkalyq tizbekterdi qalyptastyrýdy jáne sıfrlyq tehnologııalardy engizýdi negizge aldy.
TMD keńistiginde qaýipsizdikti qamtamasyz etý, onyń ishinde aqparattyq saladaǵy qaýip-qaterlerge qarsy is-qımyl jáne mádenı-gýmanıtarlyq saladaǵy, atap aıtqanda, bilim berý mekemeleriniń jelisi boıynsha ózara baılanystardy damytý baǵytynda belsendi jumys júrgiziletinin aıtty.
«Jalpy Qazaqstannyń 2022 jyly Táýelsiz Memleketter Dostastyǵyna tóraǵalyq etýiniń barlyq josparlanǵan is-sharalary tolyq kólemde oryndaldy», dep túıindedi Álıhan Smaıylov.
Sondaı-aq otyrysqa qatysýshylar 2023 jyly Belarýs Respýblıkasynda II TMD elderiniń oıyndaryn ótkizý jáne Qoǵamdyq densaýlyq saqtaý salasyndaǵy sanıtarlyq-epıdemıologııalyq sıpattaǵy tótenshe jaǵdaılar týraly eskertý, olarǵa den qoıý jónindegi yntymaqtastyq týraly kelisimdi qabyldaý máselelerin talqylady.
Shara qorytyndysy boıynsha birqatar qujatqa qol qoıyldy.
