Ana men bala úshin jaqsy jaǵdaı jasalǵan

Ana men balanyń densaýlyǵy­nyń jaǵdaıy – qoǵamnyń ál-aýqa­tynyń kórsetkishi. Elimizdiń tur­ǵyndarynyń úshten eki bóligin 18 jasqa deıingi jasóspirimder men bala týýǵa qabiletti jas shamasyndaǵy áıelder quraıdy. Sondyqtan áıel­derdiń reprodýktıvtilik densaý­lyǵyn saqtaý, ana bolýdyń qaýipsiz negizi retinde basym mańyzǵa ıe. Densaýlyqty saqtaýdyń ulttyq saıa­saty «Qazaqstan-2050» Damý strategııasyna sáıkes oblysymyzda qabyldanǵan «2050 jylǵa deıin turǵyndardyń densaýlyǵyn jaqsartý strategııasy» atty aýmaq­tyq baǵdarlamanyń basym baǵyty ana qaýipsizdigi men otbasyn josparlaýǵa arnalǵan. Jalpy densaýlyq salasyna jyl saıyn qomaqty qarjy bólinedi. Salynatyn medısınalyq nysandar da eselep artýda. Taraz qalalyq №7 emhanasy jalpy sany – 11217 anaǵa, onyń ishinde – 5543 reprodýktıvtilik jas shamasyndaǵy áıelderge jáne 6491 balalarǵa medısınalyq qyz­met kórsetedi. Gınekologııa bólim­shesiniń meńgerýshisi T.Nazarova, joǵary sanatty akýsher-gınekolog A.Maselbekova, pedıatrııa bólimshesiniń meńgerýshisi N.Vası­tova, joǵary sanatty dáriger-pedıatr E.Kalıýjnaıa jáne t.b. dárigerler kópbalaly, sondaı-aq jalǵyzilikti analarǵa, áleýmettik jaǵdaıy nashar otbasylarǵa psıhologııalyq-áleýmettik kómek kórsetýde aıanbaı eńbek etýde. 2012 jyl men 2013 jylǵy málimetterdi salystyrar bolsaq, týý kórsetkishi 22,4 paıyzdan 26,3 paıyzǵa óskenin baıqaýǵa bolady. №7 qalalyq emhanasynda «Otbasyn josparlaý» bólmesi jumys isteıdi, munda reprodýktıvtilik jas shamasyndaǵy áıelderge, júkti áıelderge, bolashaq analarǵa únemi keń kólemde aqparattandyrý jumystary, dárister, oqý-jattyǵýlar júrgiziledi. Al, «Deni saý bala» bólmesiniń meıirbıkesi N. Ábjaparova jas analarǵa ana sútiniń mańyzdylyǵy men onyń náreste aǵzasyna paıdalylyǵy týraly túsindirý jumystaryn júrgizip otyrady. Teginde dúnıege deni saý balany ákelý men otbasynyń berik bolýy – bul óskeleń qoǵam damýynyń basty kepili. Dınara SÁRSENOVA, №7 qalalyq emhananyń bas dárigeri. TARAZ.