Ońtústik Koreıanyń premer-mınıstri Han Dak Sý el tarıhyndaǵy eń aýyr apattardyń biri - Seýldegi Helloýın merekesine qatysty oqıǵany tekserýge ýáde berdi. Ońtústik Koreıada bir aptalyq qaraly kún jarııalandy.
Sheneýnikterdiń habarlaýynsha, bir túnde qaza tapqandar sany 154-ke jetken. Zardap shekkender sany áli de ósýde, 149-y jaralanyp, 33-iniń jaǵdaıy aýyr dep baǵalanǵan. Qaza tapqandar arasynda keminde jıyrma eldiń azamattary bar.
«Úkimet bul qaıǵyly oqıǵanyń sebepterin muqııat zerttep, mundaı jaǵdaı qaıtalanbaýy úshin qajetti ınstıtýsıonaldyq ózgeristerdi engizý úshin qoldan kelgenniń bárin jasaıdy. Biz otbasylardyń pikirin eskere otyryp, qajetti qoldaý kórsetýge bar kúshimizdi salamyz», dedi premer-mınıstr Han Dak Sý.
Búginde qurbandarǵa taǵzym sharalary ótip jatyr. Ońtústik Koreıa halqy Itevon metro stansııasynyń janyna aq hrızantemalar men shamdardy qoıýda. Mańaıdaǵy dúkender men dámhanalar jabylyp, polısııa oqıǵa ornyn qorshaýǵa alǵan.
Ońtústik Koreıa bıligi habarlaǵandaı, ulttyq aza tutý kúni jarııalandy. Prezıdent Iýn Sok Iol apat bolǵan Itevon aımaǵyna baryp, qurbandarǵa taǵzym etti.
Eske salaıyq, 29 qazanda Seýldiń áıgili Itevon aýdanynyń kóshelerine myńdaǵan adam Helloýın merekesin toılaýǵa jınalǵan bolatyn. Adam sany kóp jınalǵan aımaqta, qysylyp-tunshyqqannan 150-den astam qaza tapty.
Seýl qalasynyń jedel shtaby men polısııasynyń málimetinshe, Itevon aýdanyndaǵy qaıǵyly oqıǵadan zardap shekkenderdiń arasynda Qazaqstan azamaty da bar.
