Qazan aıynyń basynda bolǵan bul oqıǵanyń zerttelmegen tustary kóp.
Patrıot jáne ádildik úshin kúresýshi. Erbol Musabalanovty týǵan-týystary men dostary dál osylaı eske alady. О́miriniń 23 jylyn áskerı qyzmetke arnaǵan azamat óziniń shynshyldyǵynan basshylyqqa unamaı qalǵan deıdi týystary. Bul týraly qoshtasý hatynda da aıtylǵan.
«Meniń ólimime Qabaqovty, Ilııasovty – tikeleı onyń komandıri – ekinshi dárejeli starshına Májıtovti kinálaýyńyzdy suraımyn», dep jazǵan marqum.
Basshylyq tarapynan bolǵan qysym týraly Erbol jaqyndaryna birneshe ret aıtqan. Jetigen áskerı qurylymynda jumys istegisi kelmegendikten, úsh aı boıy Almatydaǵy basqa bólimge aýyspaq bolypty. Qujattaryn jınaǵanymen, basshylary qol qoımaǵan.
«Biz Boraldaıdaǵy kadr bólimine qońyraý shaldyq. Ol «Maǵan eshteńe baılanysty emes, basshy qalaı deıdi, solaı bolady» dedi. Qujattaryn da ótkizbeı qoıǵan. Keıin ózinen suramaı, syrtynan Serebrıanskke aýysý týraly buıryq shyǵarǵan», dedi aǵasy Ýálıhan.
Serjant qaıtys bolǵan kúni, 6 qazanda ony aýdarý týraly buıryq shyǵady. Jaqyndarynyń aıtýynsha, bul sýısıdke sebep bolǵan.
Odan bólek, birneshe kún buryn Erbol Musabalanov úıinde áskerı bólimdegi jemqorlyq týraly aqparat saqtalǵan qatty dısk baryn týystaryna aıtqan. Bul týraly aldyn ala úshinshi tarap ta bilgen bolýy kerek, 11 qazan jaqyndary tergeýshimen barǵanda Musabalanovtyń úıine bógde adamdar kirip tintigenin ańǵarǵan. Qatqyl dısk sol kúıi tabylmady.
Qazirgi tańda ekinshi sanattaǵy serjant Erbol Musabalanovtyń ólimine qatysty QK 201-baby «О́zin ózi óltirýge deıin jetkizý» boıynsha is qozǵalǵan.
