Mundaı kelisim Saýda jáne ıntegrasııa mınıstri Serik Jumanǵarın bastaǵan qazaqstandyq delegasııasynyń Iran Islam Respýblıkasyna jumys sapary kezinde jasalǵan.
Kezdesý barysynda talqylanǵan máseleler - Qazaqstandyq agrarlyq jáne ónerkásiptik ónimder úshin jańa ótkizý naryqtaryna shyǵý múmkindikteri men qoldanystaǵy soltústik-ońtústik baǵyttaǵy kedergilerdi joıý.
Sondaı-aq Serik Jumanǵarın ekijaqty kezdesý bul Qazaqstan men Iran arasyndaǵy ózara syılastyq pen senimdi qarym-qatynastyń aıǵaǵy ekenin aıtty.
Irannyń Kólik jáne qalany damytý mınıstri Rostam Qasemımen kezdesý barysynda Serik Jumanǵarın qazaqstandyq taraptyń taýarlar kólemin jylyna 1 mln tonnadan 4 mln tonnaǵa deıin ulǵaıtý nıetin aıtty. Ol úshin 2022 jyldyń sońyna deıin «tar» ınfraqurylymdyq oryndardy joıyp, 2022-2025 jyldarǵa arnalǵan Soltústik-Ońtústik baǵytynyń áleýetin damytý boıynsha úshjaqty jol kartasyn qabyldaýǵa kelisti.
Sonymen qatar kelisimniń ishinde kelesideı tarmaqtar bar:
– júk kóligi júrgizýshileri, halyqaralyq tasymaldarǵa qatysýshylar úshin arnaıy vızalyq rejım qurý. Bıznes ókilderi úshin osyndaı vızalyq jeńildikter alý múmkindigin qarastyrý;
– biryńǵaı tarıf, biryńǵaı kólik qujatyn jáne biryńǵaı aqparattyq júıeni engizýdi qosa alǵanda, eki eldiń kedendik resimdeý prosesterin ońtaılandyrý;
– «Qyrǵyzstan - Qazaqstan - Reseı» úlgisi boıynsha navıgasııalyq plombalardy paıdalana otyryp, «Qazaqstan - Túrikmenstan - Iran» baǵyty boıynsha júkterdi avtokólikpen tasymaldaý boıynsha pılottyq jobany iske qosý.
Sondaı-aq logıstıkalyq prosester men ekijaqty saýdanyń tıimdiligin arttyrý maqsatynda taraptar birlesken eksporttyq-ımporttyq kompanııa qurý múmkindigin pysyqtaýǵa kelisken.
Kezdesý nátıjesinde taraptar saýda, kólik jáne logıstıkany damytý salasyndaǵy ózara is-qımyl jónindegi ortaq memorandýmǵa qol qoıdy.
