Pavlodar oblysynda kóliktik ınfraqurylymdy damytý josparlanǵan

ASTANA. 28 mamyr. Ekonomıkalyq yqpaldastyq aıasynda Pavlodar oblysynda kóliktik ınfraqurylymdy damytýǵa zor kóńil bólingeli tur. Bul týraly Prezıdent janyndaǵy Ortalyq kommýnıkasııalar qyzmetinde ótken «Eýrazııalyq ıntegrasııa aıasyndaǵy óńiraralyq ózara is-qımyl máseleleri» atty brıfıngte Pavlodar oblysy ákiminiń birinshi orynbasary Dúısenbaı Turǵanov aıtty. BNews.kz tilshisiniń osyǵan oraı habarlaýynsha, biryńǵaı kóliktik orta qalyptastyrýdaǵy bul qadamnyń bereri mol. «Ekonomıkalyq yqpaldastyqtyń mańyzdy baǵyty – biryńǵaı kóliktik orta qalyptastyrý. Qazaqstan Eýrazııa qurylyǵynyń ortasynda ornalasqan, ıaǵnı osy zamanǵy kóliktik ınfraqurylymdy qalyptastyrý men damytý jumysy júrgiziledi. Bizde Astana – Pavlodar – О́skemen jańa avtomobıl joly salynyp jatyr. Omby – Maıqapshaǵaı trassasy qaıtadan jańartylýda», - dedi D.Turǵanbaı. Pavlodar qalasynda kóliktik-logıstıka termınalyn salý josparlanyp otyr. Ol álemdik talaptarǵa jaýap beretin iri qoıma-termınal bolmaq. «Osynyń barlyǵy Qazaqstan jáne Reseı arasyndaǵy júk aǵynyn arttyrýǵa múmkindik beredi, júk tasý ýaqytyn qysqartady. Búginde bizde Máskeý, Sankt-Peterbor, Mınsk qalalaryna deıin áýe baǵyty júzege asyrylyp otyr. Biz qazir Omby, Novosibir jáne Barnaýylǵa áýe reısin ashý jóninde kelissózder júrgizip jatyrmyz», - degendi qosty ol. Murat Aıtqoja. Derekkóz: Primeminister.kz. Foto: hvylya.org.