«Oıyn bıznesine qatysy bar barlyq polısııa qyzmetkerlerine tekserý júrgizildi. Is júzinde 88 polısııa qyzmetkeri anyqtaldy. Al, Almaty oblysy prokýratýrasynyń málimeti boıynsha, 97 polısııa qyzmetkeri anyqtalǵan. Olardyń 17-si buryn ishki ister organdarynan bosatylǵan. «Quqyq qorǵaý qyzmeti týraly» zań talaptary boıynsha oıyn bıznesimen aınalysqan qyzmetkerlerge qatysty tártiptik sharalar qoldanyldy», delingen vedomstvo málimetinde,
Sondaı-aq IIM barlyq basshylyqpen jáne ishki ister organdarynyń qyzmetkerlerimen zańnama talaptaryn saqtaý boıynsha profılaktıkalyq jumystar júrgizdi.
Degenmen, Ishki ister mınıstrligi atalǵan 88 qyzmetkerdiń kim ekenin, qandaı qyzmet atqarǵanyn, jyldyq jalaqysy qansha, oıynhanada qansha utylǵanyn aıtýdan bas tartty.
Buǵan deıin Ishki ister mınıstri Marat Ahmetjanov tergeý tek qazirgi qyzmetkerlerge ǵana emes, burynǵy qyzmetkerlerge de qatysty júrgizilip jatqanyn aıtqan edi.
Eske salaıyq, buǵan deıin Almaty oblysynyń prokýratýrasy tekserý júrgizip, ár oblys pen basqarmalardan kelgen 305 memlekettik qyzmetkerdiń memlekettik qyzmette jumys istegen kezinde oıynhanada 507 mıllıon teńge jumsaǵanyn anyqtaǵan bolatyn.
«Almaty oblysy polısııa departamenti qyzmetkerleriniń qumar oıyndarǵa qatysýy anyqtaldy. Jyldyq tabysy 3 mıllıon teńgeden aspaıtyn Qazaqbekov D.A. «Bombeı» oıynhanasyna 76 ret baryp, 15 mıllıon teńge jumsaǵan. Jyldyq tabysy 1,5 mln teńgeni quraıtyn Baqytov A.B. «Astoria» kazınosyna 13 ret baryp, 23 mln teńge kóleminde qarjy jaratqan», delingen prokýratýranyń qujatynda.
