Saltanatty is-sharaǵa qalalyq ákimdik, qorǵanys isteri jónindegi departamenttiń ókilderi, Qarýly Kúshterdiń ardagerleri men sarbazdardyń ata-analary arnaıy shaqyryldy.
Bir jyl buryn áskerge ketken nemeresi Álisher Tastybaıdy qarsy alǵan Astana qalasynyń turǵyny, zeınetker Kúlpán Shaısultanova ıgi is-sharany uıymdastyrýshylarǵa alǵysyn aıtty.
– Álisher qazirgi Qonaev, burynǵy Qapshaǵaı qalasyndaǵy áskerı bólimde qyzmet etti. Bir jyl ishinde nemerem shyńdalǵan, shynyqqan azamat bolyp oraldy. Bólim basshylyǵyna myń da bir raqmet. Qyzmet barysynda balamyzben únemi baılanysta boldyq. Parashıýtpen sekirgen sýretine deıin salyp jiberetin. Maqtaý qaǵazdary da jeterlik, – deıdi qýanyshyn jasyra almaǵan áje.
Poıyzdan túsken sarbazdar sap túzep kelip, top basshysy áskerı tártippen Astana qalasy qorǵanys isteri jónindegi departamentiniń bastyǵy, podpolkovnık M.Turyskeldıevke baıanat berdi:
– Podpolkovnık myrza, astanalyq sarbazdar 35-gvardııalyq desanttyq shabýyldaýshy brıgadasynda abyroımen áskerı qyzmet atqaryp, otbasyna oraldy. Top basshysy, qatardaǵy jaýynger Álisher Nazıev!
Saltanatty marshtan soń «Qarýly Kúshter ardagerleri» qoǵamdyq uıymynyń orynbasary, general-maıor M.Naǵumanov otbasyna oralǵan sarbazdardy quttyqtap, sóz sóıledi.
– Sizderdi bir jyl buryn áskerge saltanatpen shyǵaryp salǵan edik. Elimizdiń tynyshtyǵyn qorǵaý jónindegi halyqtyń tapsyrmasyn sizder adal oryndadyńyzdar. Sizderge beriletin endigi tapsyrma – berik otbasyn quryp, urpaq ósirip, adal eńbek etý. Elimizdiń damýyna úles qosa berińizder! – dedi general-maıor.
Qorǵanys isteri jónindegi departament ókilderiniń aıtýynsha, áskerı qyzmettiń bedelin arttyrý maqsatynda mundaı is-sharany uıymdastyrý aldaǵy ýaqytta dástúrge aınalmaq.
