Qala ákimi Murat Báımenovtiń aıtýynsha, oblys ortalyǵynyń aldaǵy ondaǵan jyldarǵa arnalǵan strategııalyq qujaty 2023 jyldan beri ázirlenip jatyr. Oral shaharynyń uzaq merzimdi, júıeli damýyna baǵyttalǵan bul sheshim 2030, 2040 jáne 2055 jyldarǵa deıingi kezeńderdi qamtıdy.
Mamandar qalanyń batys baǵytta damýyna basymdyq berip otyr. Sonyń biri – jańadan salynyp jatqan «Aqjaıyq» shaǵyn aýdany. Ol «Aqjaıyq-1» «Aqjaıyq-2», «Aqjaıyq-3» degen bólikterden turmaq. Jalpy bul jerde 1,7 mln sharshy metrden astam turǵyn úı salynyp, 112 myń adamǵa deıin qonystanady.
«Bizdiń basty ustanym – tek baspana emes, ınfraqurylymy tolyqqandy aýdandar qalyptastyrý. Mektep, balabaqsha, emhana, sport jáne qoǵamdyq nysandar qatar damýy tıis», deıdi Oral qalasynyń ákimi.
Aldaǵy 20 jylda qala aýmaǵynda 79 balabaqsha, 36 mektep, 3 emhana, 2 aýrýhana, 11 qoǵamdyq ortalyq, 5 sport kesheni jáne 18 órt ǵımaratyn salý kózdelgen.
Oraldaǵy japondyq «Hitachi» týrbınasynyń jóndeý jumystary sátti aıaqtaldy
Burynǵy «Zachaganskıı» baý-baqsha seriktestigi, qazir «Qus fabrıkasy» atalatyn aýmaq aqyry turǵyn úı aımaǵyna aýystyrylatyn boldy. Bul sol jerdi mekendegen halyqtyń kópten bergi talaby bolatyn. Qazir munda 12 myńǵa jýyq adam turady. Endi ol jerge ınjenerlik ınfraqurylym salynyp, shaǵyn aýdan júıeli damyıtyn boldy. Biraq sáýletshilerdiń aıtýynsha, bul jerde kópqabatty úıler salý josparlanbaǵan.
Bolashaqta Oral qalasynyń kólik ınfraqurylymy da kúsheıtiledi: úsh jańa kópir salynyp, batys aınalma jolyn qalyptastyrý jáne kólik júktemesin azaıtý kózdelgen.
«Sonymen qatar 153 tarıhı-mádenı nysandy qorǵaý sharalary kúsheıtiledi. Qalanyń tarıhı kelbetin saqtaý – basty mindettiń biri», deıdi Murat Báımenov.
Batys Qazaqstan oblysy
