Foto: Ashyq derekkóz
Joǵarǵy halyq sotynyń málimetinshe, bul – eldegi JI «gallıýsınasııasyna» (ıaǵnı qate nemese oıdan shyǵarylǵan aqparat berýine) baılanysty tirkelgen alǵashqy sot daýy.
2025 jyldyń maýsym aıynda Lıan esimdi qoldanýshy qytaılyq JI qosymshasynan bir ýnıversıtet týraly aqparat suraǵan. Alaıda júıe naqty emes derek usynǵan. Qoldanýshy qatelikti kórsetkennen keıin, JI:
«Eger usynylǵan aqparat qate bolsa, sizge 100 myń ıýan (shamamen 14 myń dollar) ótemaqy tóleımin. Hanchjoý ınternet-sotyna shaǵymdana alasyz», dep jaýap bergen.
Lıan resmı derekterdi usynǵan soń ǵana JI qateligin moıyndaǵan. Osydan keıin ol sotqa júginip, jańsaq aqparat ony adastyrǵanyn jáne aqparatty tekserýge qosymsha shyǵyn jumsaǵanyn alǵa tartyp, 9 999 ıýan kóleminde ótemaqy talap etken.
Alaıda jaýapker tarap dıalog mazmuny tolyǵymen model arqyly avtomatty túrde jasalǵanyn jáne onyń quqyqtyq mańyzy joq ekenin málimdedi. Sonymen qatar talapker naqty materıaldyq shyǵynǵa ushyramaǵanyn atap ótti.
Hanchjoý ınternet-soty talapty qanaǵattandyrýdan bas tartty. Sot sheshiminde jasandy ıntellekt bergen «ýáde» kompanııanyń resmı mindettemesi bolyp sanalmaıtyny naqty kórsetilgen.
Sondaı-aq sot jaýapker qosymshada jáne paıdalanýshy kelisiminde JI-diń mazmun jasaý fýnksııasynyń shekteýli ekeni týraly eskertýlerdi anyq ári kórneki túrde ornalastyrǵanyn atap ótti. Kompanııa aqparattyń senimdiligin arttyrý úshin izdeý júıesimen tolyqtyrylǵan generasııa tásilin qoldanǵan. Sot osyny eskere otyryp, jaýapker óz mindetin oryndaǵan jáne kinási joq degen qorytyndyǵa keldi.
Sınhýa ýnıversıteti janyndaǵy quqyq ınstıtýtynyń professory Chen Sıao bul is azamattardyń quqyqtaryn qorǵaý men JI tehnologııalaryn damytý arasyndaǵy tepe-teńdikti eskere otyryp sheshilgenin aıtty. Onyń pikirinshe, bul is teorııalyq ári praktıkalyq turǵydan mańyzdy.
Qytaıdyń jelilik aqparat ortalyǵynyń esebine sáıkes, 2025 jyldyń maýsymyndaǵy jaǵdaı boıynsha elde generatıvti JI qoldanýshylarynyń sany 515 mıllıon adamǵa jetken. Bul jalpy halyqtyń 36,5%-y. Generatıvti JI ıntellektýaldy izdeý, kontent jasaý jáne keńse jumysyna kómek kórsetý sııaqty salalarda keńinen qoldanylady.
