Zamanaýı qoǵamda otandyq ǵylymdy damytý - ózekti máselelerdiń biri. Alaıda ǵylym salasynda jas mamandar óte az. Prezıdenttiń aıtýynsha, Ǵylym akademııasyna ǵylymǵa jany ashıtyn, ǵylymı áleýeti zor azamattardy kóptep tartý qajet.
«Almaty – ǵylym men bilimniń ordasy. Otandyq ǵylymdy damytý máselesi – únemi meniń jeke nazarymda. Bul salanyń elimiz úshin aıryqsha máni bar. Sebebi, ǵylymnyń búgingi damýy – eldiń erteńgi tabysynyń kepili. О́kinishke qaraı, bizde ǵylymdy basqarý isi jolǵa qoıylmaǵan. Men bul týraly Ulttyq akademııanyń 75 jyldyǵyna arnalǵan jıynda aıttym. Búginde otandyq ǵylymda jas ǵalymdardyń sany kóp emes. Damýǵa serpin beretin áleýetti ǵylymı ınstıtýttar da óte az. Eger álemdik damýda kósh sońynda qalmaımyz desek, eń aldymen, ǵylymdy damytýymyz kerek. Sondyqtan, ulttyq ǵylymdy jańa deńgeıge kóteretin mezgil jetti. Jasyratyny joq, qazir ǵylymı ataǵy bar, biraq ilim-bilimge múlde qatysy joq adamdar kóbeıip ketti. Elimizge ómir jolyn ǵylymǵa arnaǵan, naqty ǵylymı jetistigi bar adamdar kerek. Otandyq ǵalymdar quramyn jańartý qajet. Bul – ýaqyt talaby. Naǵyz ǵylymǵa múldem qatysy joq adamdardan arylýymyz qajet. Olardan eshqandaı paıda joq, ǵylymǵa keri áseri tıedi. Sondyqtan, Ǵylym akademııasyna ǵylymǵa jany ashıtyn, ǵylymı áleýeti zor azamattardy ǵana kóptep tartý qajet», dep atap ótti Memleket basshysy.
Jıyn barysynda Qasym-Jomart Toqaev otandyq ǵylymdy damytý maqsatynda Prezıdent janynan Ǵylym men tehnologııa máseleleri jóninde ulttyq keńes qurylatynyn málimdedi.
«Biz ǵylym men óndiristi ushtastyrý týraly jıi aıtamyz. Biraq ondaı baılanys áli de ornyqqan joq. Ashy bolsa da, muny moıyndaýymyz kerek. Otandyq óndiristi órkendetý úshin ǵylymı ınnovasııalar, jańalyqtar qajet. Ǵalymdarymyzdyń eńbegi sapaly ónim shyǵarýǵa nemese óndiristi tıimdi etýge tıis. Sonda ǵana ekonomıkamyz damıdy. Osy oraıda, men taǵy bir mańyzdy bastama – Prezıdent janynan Ǵylym men tehnologııa máseleleri jóninde ulttyq keńes qurý jóninde sheshim qabyldadym. Oǵan eńbekteri jurtshylyqqa keń tanymal, ǵylymı ortada óte bedeldi ǵalymdarymyz múshe bolady. Bul qurylym ǵylym men tehnologııa salasyndaǵy saıasattyń basymdyqtaryn aıqyndaıdy. Prezıdent Ákimshiligi, Ǵylym jáne joǵarǵy bilim mınıstrligi tıisti jumysty uıymdastyrýy qajet. Bul másele meniń jiti nazarymda», dep túıindedi el Prezıdenti.
