«Men oblystarǵa saparymda jalpy eldiń máselelerin kóterip júrmin. Aımaqtarda aıtylǵan oı-pikirlerimdi búgin qorytqym kelip otyr. Biz jańa qoǵam quryp jatyrmyz. Sońǵy birneshe jylda saıası reforma aıasynda kóptegen ózgeris jasadyq. Biraq biz tek saıası máselemen shektelip qalmaımyz. Alda ekonomıkalyq, áleýmettik jáne basqa da baǵyttar boıynsha aýqymdy jumys tur. Degenmen, túpki maqsatymyzǵa jetý úshin bul jetkiliksiz. Biz ózgeristi, eń aldymen, ózimizden bastaýymyz kerek. Ulttyń jańa sapasyn qalyptastyrýymyz qajet. Ár azamattyń, búkil qoǵamnyń sanasy ózgermeıinshe, basqa reformanyń bári beker. Ulttyń jańa sapasy jańa qundylyqtar arqyly qalyptasady», dedi Qasym-Jomart Kemeluly.
Osy oraıda, Memleket basshysy qazaq halqy úshin mańyzdy qasıetter men qundylyqtarǵa qysqasha toqtalyp ótti.
«Birinshi mańyzdy másele. Biz eńbekqor bolýymyz qajet. Qoǵamymyzda eńbek adamy birinshi orynda turýǵa tıis. Shyn máninde, barlyq jetistiktiń bastaýy – adal eńbek jáne iskerlik. Tabysqa jetýdiń jalǵyz joly – óz kásibiniń sheberi bolý jáne erinbeı eńbek etý. Túrli qarjy pıramıdasyna, qumar oıyndarǵa áýes adamdar aqshanyń ońaı jolmen kelmeıtinin túsinýi kerek. Mańdaı terimen tabys tapqan adam ony maqsatsyz shashyp, ysyrap qylmaıdy. Únemshil, qanaǵatshyl ári uqypty bolady», dep atap ótti Prezıdent.
Bul rette Qasym-Jomart Toqaev belgili akademık Asqar Jumadildaevtyń sózin negizge alyp, jastardy adal eńbek etýge shaqyrdy.
«Akademık Asqar Jumadildaev aıtqan paıymmen tolyq kelisemin. Halqymyz osyndaı kúrdeli zamanda eń aldymen, álemge pragmatıkalyq kózben qaraýy kerek. Jastarymyzdyń sanasy sergek, eti tiri, shıraq bolýy qajet. Kórshi memleketterdegi jas azamattar shetelge baryp, kásiporyndar, dúkender ashyp, jaqsy ómir súrý úshin jańa daǵdylardy ıgerip jatyr. Olar, shyn máninde, básekege qabiletti eńbekqor adamdar. Qazirgi jaǵdaıda men bir jerde ómir súremin, balalarymmen ómir boıy birge turamyn degen uǵym ábden eskirgen. Sondyqtan qurmetti aǵaıyn, bárimiz ozyq bolaıyq! Sonda ǵana jastarymyzdyń kózi ashyq, kókiregi oıaý, oılary ushqyr bolady, kóptegen syn-qaterge tótep bere alady. О́z jaǵdaıyn ózderi jasap, jaqsy ómir súre alady», dedi Memleket basshysy.
Prezıdenttiń qoǵamda durys qundylyqtar ornyqpasa, jemqorlyq, masyldyq, ysyrapshyldyq sııaqty áleýmettik keselder tamyr jaıatynyn qadap aıtty.
«Biz jastarǵa ozyq bilimmen qatar ónegeli tárbıe berýge tıispiz. Urpaqtyń boıyna adamgershilik qasıetti sińire almasaq, bilimniń paıdasynan zııany kóp bolýy múmkin. Qansha jerden bilimdi bolsa da, jaqsylyqqa umtylmaǵan adamnan esh qaıyr joq. Qoǵamda durys qundylyqtar ornyqpasa, jemqorlyq, masyldyq, ysyrapshyldyq sııaqty áleýmettik keselder tamyr jaıady. Qatigezdik, nemquraılyq, jalqaýlyq – ulttyń bolmysyna teris áser etetin jaǵymsyz ádetter. Qazirgi almaǵaıyp zamanda biz sabyrly, baıypty bolýymyz qajet. Túrli arandatýǵa ilespeı, ár nársege ustamdylyqpen qaraýymyz kerek. Barlyǵyn bir sátte ózgertemin deýge bolmaıdy. Halyqqa qajetti sharalardy birtindep júzege asyryp jatyrmyz.
Elimizde jaýapkershilik ıdeologııasy ornyǵýǵa tıis. Oılanbaı jasalǵan bir qadam, ańdamaı aıtylǵan bir aýyz sóz, ashýmen istelgen bir áreket búkil elge qaýip tóndirýi múmkin. Sondyqtan árbir adam el aldyndaǵy jaýapkershiligin tereń sezinýge tıis. Biz árdaıym ózara baýyrmaldyq pen tilektestikti, meıirimdilikti dáripteýimiz kerek. Azamattardyń bir-birine qamqorlyǵy elge degen janashyrlyqqa ulasady. Biz otanshyl jáne memleketshil bolýymyz kerek. Shyn máninde, týǵan jerińdi súıýden asqan baqyt joq. Júregi Otanym, elim, jerim dep soqqan adam eshteńeden qaımyqpaıdy. Bizdiń Qazaqstannan basqa Otanymyz joq. Eń basty baılyǵymyz – týǵan elimiz. Sondyqtan memleket múddesi qashanda barlyǵynan bıik turady», dep qosty ol.
