Almaty qalasynda short-trekten 2022 jyldyń 9-11 jeltoqsan aralyǵynda III, 16-18 jeltoqsan aralyǵynda IV álem Kýbogi kezeńderi ótedi. Bul jarystarda 30 eldiń 250-ge jýyq sportshylary baq synamaq.
Jarystar Almatynyń «Halyq Arena» muz saraıynda ótedi. Álem kýboginde bedeldi sportshylar, Olımpıada jáne Azııa oıyndarynyń, álem chempıonattary men álem Kýbogtarynyń chempıondary men júldegerleri synǵa túsedi.
Ulttyq qurama komandamyzdyń sapynan 12 sportshy baq synaıdy:
Erler: Abzal Ájiǵalıev, Ádil Ǵalıahmetov, Denıs Nıkısha, Nurtilek Qajǵalı, Erkebulan Shamuhanov, Sanjar Janısov
Qyzdar: Olga Tıhonova, Iаna Han, Madına Janbýsınova, Anastasııa Astrahanseva, Alına Ajgalıeva, Alıona Volkovıskaıa.
Eske sala ketsek, bıylǵy álem kýboginiń birinshi kezeńi Monrealda (Kanada) ótip, bizdiń sportshylar erler estafetasynda kúmis júldege qol jetkize aldy.
Ekinshi kezeń Solt-Leık-Sıtıde (AQSh) ótti. Ol jarysta Abzal Ájiǵalıev pen Denıs Nıkısha 500 metr qashyqtyqqa júgirýden eki kúmis medal enshilese, 1000 metrge júgirýden Ádil Ǵalıahmetov qola júldeger atandy.
Almatydaǵy jarystardan keıin short-trekshiler Drezdenge (Germanııa) attanady. Al bıylǵy maýsymnyń sheshýshi ári sońǵy kezeńi Dordreht qalasynda (Nıderlandy) ótedi.
