Kitapta aqynnyń ǵylymı zertteýleri, halyqqa tanymal án mátinderi, óleńderi toptastyrylǵan. Sonymen qatar, áriptes, qalamdastary men otbasy múshelerimen túsken fotosýretteri berilgen.
Saltanatty sharaǵa memleket jáne qoǵam qaıratkerleri, aqyn-jazýshylar, zııaly qaýym ókilderi, Shómishbaı Sarıevtiń jary Jumaǵul Sarıeva men uly, QR Prezıdenti Keńsesiniń bastyǵy Baqytjan Shómishbaıuly, qazaq estradasynyń juldyzdary, QazUÝ-dyń oqytýshy-professorlar quramy qatysty.
Jıyndy bilim ordasynyń basshysy Janseıit Túımebaev quttyqtaý sózben ashyp, Shómishbaı Naǵashybaıulynyń ómir jolyna toqtaldy.
«Qazaq poezııasynda, ádebıettaný ǵylymynda erekshe qoltańba qaldyrǵan Shómishbaı Sarıev – bizdiń ýnıversıtetimizdiń túlegi. 1966 jyly QazMÝ-dyń jýrnalıstıka fakýltetine oqýǵa túsip, 1971 jyly bitirgen. «Qazaqstan» baspasynda redaktor, «Juldyz» jýrnalynda bólim meńgerýshisi, M.Áýezov atyndaǵy Ádebıet jáne óner ınstıtýtynda ǵylymı qyzmetker, aǵa ǵylymı qyzmetker boldy. Shómishbaı Sarıev ǵalym retinde 50, 60, 70-jyldardaǵy qazaq aqyndarynyń shyǵarmashylyǵyn taldady. Táýelsizdik kezeńindegi qazaq poezııasynyń jańa býyn ókilderi týraly da zertteýler júrgizdi. Shómishbaı Sarıevty ádebı orta «qazaqtyń Pýshkıni» dep ataǵanyn bilemiz. О́leńderi ánge aınalyp, tyńdarman qaýymnyń júregine jetti. Kózi tirisinde 300-den asa ánge mátin jazyp, ulttyq án ónerin baıytty», dedi Janseıit Túımebaev.
Jazýshylar odaǵy basqarmasy tóraǵasynyń orynbasary, aqyn Baýyrjan Jaqyp shyǵarmashylyǵynyń ómirsheńdigine toqtaldy.
О́z kezeginde Qazaqstannyń eńbek sińirgen qaıratkeri, ardager dıktor Saýyq Jaqanova Shómishbaı Sarıevtiń óleńderin mánerlep oqyp, jınalǵandardy bir serpiltip tastady. Sonymen qatar, M.Áýezov atyndaǵy Ádebıet jáne óner ınstıtýtynyń aǵa ǵylymı qyzmetkeri Gúljahan Orda, Qazaqstannyń eńbek sińirgen qaıratkeri Estaı Álikeev sóz sóılep, estelikterimen bólisti.
Jıyn barysynda ánshi Medeý Arynbaev Sh.Sarıev óleńine jazylǵan «Atameken-aı» men «Dáýren-aı» ánderin jáne jas ánshi Ermek Bereket el arasynda tanymal bolyp ketken «Qaraǵym-aı» ánin oryndady.
Kezdesý sońynda aqynnyń jary Jumaǵul Sarıeva keshti uıymdastyrǵany úshin QazUÝ basshylyǵyna rızashylyǵyn bildirdi. О́z sózinde ol búgingi «Ǵıbratty ǵumyr» serııasy arqyly basylyp shyqqan kitaptyń orny bólek ekenin jetkizdi.
«Shómishbaı Sarıevtiń 30-dan astam kitaby jaryqqa shyqty. Búgin tusaýkeseri ótken kitap men úshin ystyq. Ol osy Qazaq ulttyq ýnıversıtetin bitirip, myqty oqytýshylardan sabaq aldy. О́miriniń sońyna deıin QazUÝ-da ótken stýdenttik kezderin saǵynyshpen eske alyp, esinen esh ýaqytta shyǵarǵan emes. Shómishbaı bir eli aýzynan tastamaı aıtyp otyratyn bilim ordasy búgin úlken kesh ótkizip, aqynnyń ómiri men shyǵarmashylyǵyna arnalǵan kitapty jaryqqa shyǵaryp otyr. Igi bastamaǵa áýletimizdiń atynan rızashylyǵymdy bildiremin», dedi Jumaǵul Kajenqyzy.
Shara aıasynda Shómishbaı Naǵashybaıulynyń ómiri men shyǵarmashylyǵyna arnalǵan kitap kórmesi uıymdastyryldy.
