Qýansa, bala qýansyn

Eski ǵımaratty tolyq jón­deý­den ótkizgen Eskeldi aýdany­na qarasty Qarabulaq aýyly «Alaqaı» balabaqshasyn ashty. Osy­laısha Balalar jylyn jaq­sy notada qorytyndylady. Irgesi 1992 jyly qalanǵan nysan kúrdeli jóndeýden keıin jańǵyryp shyǵa keldi. Buryn munda «Berezka» balabaqshasy bolǵan, ol «Qarabulaq qant zaýyty» AQ-ǵa qaraıtyn edi. Aksıonerlik qoǵam ókilderi 2020 jyly ǵımaratty aýdannyń kom­mýnaldyq menshigine qaıta­rym­syz negizde ótkizip bergen eken. Keıin ol aýdandyq bilim bóliminiń balansyna berilipti. Ǵımarattyń jalpy alańy – 1 043,1 sharshy metr. Bıýdjetten kúrdeli jóndeýge 422,3 mln teńge jumsalǵan.

Jetisý oblysy ákiminiń bas­pasóz qyzmetiniń málimetinshe, qu­rylys-montaj jumystaryn «Shah Qurylys kompanııasy» JShS júrgizgen. Balabaqsha barlyq qajettilikpen qamtylǵan, jıhazdary jańalanǵan, oıyn­shyq­tar, mýzykalyq jáne sport­tyq jabdyqtary túgel. Ár bólme balalardyń jasyna saı jab­dyq­talǵan. Balabaqshada 3-ten 6 jasqa deıingi balalar tár­bıe­lenedi. Bul rette bala­lar­dyń tárıbesimen qatar, sport­pen, mýzy­kamen shuǵyl­da­nýy­na jaǵdaı jasalǵan. 27 jańa jumys orny qurylǵan, 5 balalar toby bar.

Odan keıingi qýanyshty jańa­lyq Aqsý aýdanyna qarasty Jansúgirov aýylynda boldy. Aýdan ortalyǵynda «Aýyldyq jerlerdegi tirek mektepterdiń áleýetin damytý» baǵdarlamasy boıynsha E.Sıqymov atyndaǵy orta mekteptiń 22 oqý kabıneti men qosymsha bilim beretin STEM-zerthana, ART-stýdııa, telestýdııa, kovorkıng aýmaǵy bar kitaphanasynyń qural-jab­dyqtary jańalandy. Sol sııaq­ty mektep kitaphanasynyń ıntereri tolyq jańartylyp, sporttyq jabdyqtar jetkizildi. Mu­nyń bárin «Qazaqstan hal­qyna» qory qarjylandyrdy. Oǵan shamamen 250 mln teńge jumsalǵan.

Aıta keteıik, atalǵan baǵdar­­lama aýyl mektepteriniń ma­terıal­dyq-tehnıkalyq bazasyn nyǵaıtýǵa, ádisnamalyq kó­mek kórsetýge, oqýshylar men ustazdardyń tájirıbelik bilim­deri men daǵdylaryn arttyrýǵa múmkindik beredi.

«Qazir balalardyń tárbıesi men bilimine qoıylatyn talap buryn­ǵydan ózgeshe. Balalar­dyń jan-jaqty damýyna, shyǵar­ma­shy­lyq izdenisine, eń aldymen balanyń talanty men qabiletin eskere otyryp erkindik berilýge tıis. Joba aıasynda «Nazarbaev zııatkerlik mektebimen» tájirıbe almasýdyń, yntymaqtastyqta jumys isteýdiń bizdiń muǵalimder úshin paıdasy zor boldy. Oqytý prosesi oqýshylar úshin de, mu­ǵa­limder úshin de óz tıimdiligin kórsetti», dedi mektep dırektory Rahat Nyǵmetbekqyzy.

Bilim berýdi turaqty damytý qorynyń ókilderi osylaı­sha E.Sıqymov atyndaǵy mektep­tiń jaqyn mańdaǵy shaǵyn mektepter úshin tirek mektepke aınal­ǵa­­nyn atap ótti. «Eń aldymen, Qazaq­stan halqynyń basym bóli­gi aýyldyq jerde turatynyn umytpaýymyz kerek. Sondyqtan aýyl oqýshylary qala balalary sııaqty túrli múmkindikke ıe bolýǵa tıis. Búginde biz tirek mektepterdi damytýmen aınalysamyz, onsyz aýyl bilimin kóterý múmkin emes», deıdi Bilim berýdi turaqty damytý qorynyń dırektory Danııar Toqtarbaev.

Jalpy, E.Sıqymov atyndaǵy mektep-ınternatta 402 bala oqıdy. Sondaı-aq 55 pedagog ju­mys isteıdi.

Jetisý oblysy