«Keń dala» baǵdarlamasyn iske asyrýǵa negizinen nesıe seriktestikteri belsendi qatysady. Solardyń biri – «Selınograd» nesıe seriktestigi. Seriktestik Aqmola oblysynyń sharýalaryn 940 mln teńgege qarjylandyrdy. Qarjy uıymynyń basshysy bul qarajat 2023 jylǵy egis naýqanyn tıimdi júrgizýge múmkindik beretinin jetkizdi.
– Sharýalar jyl saıyn «Keń dala» baǵdarlamasy boıynsha daıyndyq qarajatyn kóktemde alatyn. Bul tıimsiz edi. Bıyl, birinshiden, qarjylandyrý kólemi ulǵaıdy, ekinshiden, egin salýshylardyń múddesin eskere otyryp, korporasııa nesıe shartyna ózgeris engizdi. Endi sharýa qojalyqtary egin egý jumystaryna qajetti aqshany jeltoqsan aıynda alyp, tuqym, janar-jaǵarmaı, tyńaıtqyshty bıylǵy baǵamen satyp ala alady. Tájirıbe kórsetkendeı, kóktemge qaraı baǵa 10-15 paıyzǵa kóteriledi, – deıdi «Selınograd» nesıe seriktestiginiń basqarma tóraǵasy Saǵadat Áshebekov.
Byltyrǵy makroekonomıkalyq jaǵdaıdy, egis jáne egin jınaý naýqanyndaǵy shyǵyndardyń artýyn, osy saladaǵy nesıe qarajatyna suranystyń joǵary ekenin eskere otyryp, memleketten qosymsha 70 mlrd teńge bólingen bolatyn
– Agrarlyq nesıe korporasııasynyń qoldaýymen byltyrǵy 5,2 mln gektar egistik jer óńdeldi. Qarajattyń bir bóligi – 23 mlrd teńge 2023 jylǵy egis jumystaryn qarjylandyrýǵa baǵyttalǵan. Agrarlyq nesıe korporasııasy aýyl sharýashylyǵy taýaryn óndirýshilerdi qarjylandyrý úshin óz qyzmetin jetildirýdi jalǵastyrady, – dedi «Agrarlyq nesıe korporasııasy» AQ basqarma tóraǵasy Almat Áshirbekov.
Qarjynyń erte bólingeniniń nátıjesinde Túrkistan oblysyndaǵy «Aı» sharýa qojalyǵy kóktemde egetin tuqymdy satyp ala bastady. Sharýashylyq ókili Baǵdat Aıbosynovtyń aıtýynsha, bul sharýalarǵa aqsha únemdeýge múmkindik beredi.
– Kúzdik daqyldy egip qoıdyq. Kóktemde 800 gektar jerge bıdaı, arpa, maqsary jáne jońyshqa egýdi josparlap otyrmyz. Tuqymyn qazir satyp alyp jatyrmyz, kóktemde áldeqaıda qymbatqa túsedi. Sondyqtan nesıeniń qazir berilgeni jaqsy. Kóktemge aýyl sharýashylyǵy tehnıkasyn, 25 tonna janar-jaǵarmaı daıyndadyq. Naýryz aıynda egin egýdi bastaımyz, – dedi «Aı» sharýa qojalyǵynyń ókili Baǵdat Aıbosynov.
Bıyl kóktemgi egis jáne egin jınaý jumystaryn júrgizýge bólinetin qarjy kólemi 140 mlrd teńge bolady dep josparlanyp otyr.
