«Aqparatqa qol jetimdilikti jeńildetý jónindegi zań aıasynda jýrnalısterdiń saýalyna jaýap berý mindetteledi. Sondaı-aq tilshilerdiń saýalyna jaýap berý merzimi de qysqarady. Biraq keıbir suraqtardyń jaýaby sapaly bolýy úshin jáne ózge de vedomstvolardyń jaýaptaryn biriktirip berý úshin olarǵa da ýaqyt berý kerek. Degenmen de 3-5 kún ishinde tilshiler saýalyna sapaly jaýap beriletin bolady. Sonymen qatar tilshiler joldaǵan saýalǵa jaýap bermegen memlekettik qyzmetkerler jaýapkershilikke tartylady. Munyń bári jýrnalıstiń aqparatqa qoljetimdiligin jeńildetý maqsatynda jasalyp jatyr. Sonymen qatar qazir zań jobasy aıasynda keıbir DSP degen qujattardyń alynyp tastalýy, jýrnalıstiń aqparatqa qoljetimdiligin barynsha qamtamasyz etý qarastyrylǵan. Qazir «Qoǵamdyq baqylaý jáne onlaın petısııa» degen de zań jobasy Májiliste jatyr. Ol da jýrnalıstiń jumysyn jeńildetedi. «Mass-medıa týraly» zańda kásibı jýrnalıstiń mártebesin kóterý, press-karttyń kimderge berilýi kerektigi týraly aıtylǵan. Jýrnalıstıkaǵa adal azamattar men zertteýsiz, eshqandaı tekserýsiz «haıp» qýalaǵandardyń arasynda aıyrmashylyq bolýy kerek. Jańa zań jobasynda jýrnalısterdiń «Otbasy bankten» jeńildikpen páter alý máselesi men aýrýhanadan jeńildikter alý sekildi usynystar bar. Qarapaıym bir mysal, kóliginde «pressa» degen jazýy bar jýrnalıster avtokóligin kez kelgen jerge qoıý nemese kez kelgen mekemege ený sekildi basqa da yńǵaıly jaǵdaılar jasaýdy qarastyryp otyrmyz. Biraq munyń bári kóptegen vedomstvolarmen birge qarastyrylady. Olardyń kelisimi alynady. Sodan keıin zań jobasy Májiliske enedi», dedi Aqparat jáne qoǵamdyq damý mınıstri Darhan Qydyráli.
Sondaı-aq vedomstvo basshysy Úkimet otyrystaryna qatysatyn, Parlamentke tirkelgen jýrnalısterdiń jumysyna kóńili tolmaıtynyn da bildirdi. Onyń aıtýynsha, BAQ ókilderi talqylanǵan zań aıasynda, atqarylýy kerek jumystar týrasynda emes taqyryptan tys suraqtar qoıyp jatady. Sol sebepti salalyq jýrnalıstıkany damytýdyń ózekti ekenin atap ótti.
Eske salaıyq, búgin elordada ótip jatqan forýmǵa ár aımaqtan 200 delegat kelgen. Forým erteń de jalǵasady.
