«Bizdiń «Ártúrli kózqaras, birtutas ultqa» negizdelgen qaǵıdatymyz myzǵymaıdy. Saıası radıkalızm men ekstremızmniń kez kelgen túrine elimizde oryn joq. Demokratııa – bul, eń aldymen, óz sóziń men isińe jaýapkershilikpen qaraý. Bárimiz bir shańyraq astynda ómir súrip jatyrmyz. Sondyqtan árbir azamat, kez kelgen qoǵam qaıratkeri, barsha saıası kúsh el bolashaǵy úshin óziniń tikeleı jaýapkershiligin sezinýi qajet.
Barsha otandastaryma aıtarym: álemde buryn-sońdy bolmaǵan kúrdeli geosaıası ahýal kezinde elimizdiń tynyshtyǵy men yrys-berekesin saqtaý tek ózimizge, birligimiz ben yntymaǵymyzǵa baılanysty. Táýelsizdigimizdi saqtaý jáne ony nyǵaıtý asa mańyzdy mindet ekenin taǵy da eske salamyn. Bul – halqymyzdyń basty qundylyǵy», dedi Memleket basshysy.
Budan soń, ol konstrýktıvti reforma baǵytymen alǵa qaraı nyq qadam basý keregin aıtty.
«Saıası jaýapkershiliktiń bıik mádenıeti men azamattarymyzdyń shynaıy patrıotızmi munyń kepili bola alady. Árqaısymyz ózara tileýlestik qaǵıdatynan aınymaýymyz kerek. Sonda ǵana teń múmkindikter men damýdy tý etken Ádiletti Qazaqstandy quramyz», dedi Prezıdent.
