Saıası naýqanǵa – tııanaqty ázirlik

Onyń aıtýynsha, byltyr qoǵamdyq qabyldaýǵa 134 myń adam óz muń-muqtajyn, aryz-shaǵymyn jetkizse, sońǵy jeti-segiz kúnniń ózinde 500-ge tarta usynys-tilek kelip túsken. Qazir qujatta basymdyq bere­tin salalar anyqtalyp jatyr. Buǵan qosa saı­laýaldy baǵdarlamada ekonomıka, ekologııa jáne energetıkadaǵy ózekti máseleler qamtylady.

– Bul jumysqa Májilistiń eks-depý­tat­tary, partııa janynan qurylǵan keńesterdiń músheleri, bilikti saıasattanýshylar jáne eko­nomıster tartyldy. Saılaýaldy baǵdar­lamaǵa usynystar halyqtan tikeleı jınalady. Partııanyń Jarǵysyna sáıkes, baǵdar­lamalyq qujattardy qabyldaý sezdiń quzyrynda. Jer-jerdegi partııalastardyń talqylaýynan jáne sarapshylardyń taldaýynan ótken saılaýaldy baǵdarlamanyń túpkilikti nusqasy aldaǵy sezde qabyl­danady. Al jol kartasynda aldaǵy 5 jylǵa arnalǵan naqty is-sharalar tizimi bekitiledi. Qujat «Qashan, qandaı jerde mektep salynady?», «Máseleni qalaı sheshemiz?» degen saýaldardyń negizinde jasaqtalǵan kon­septýaldy tásilderden turady, – dedi E.Beısenbaev.

Atqarýshy hatshy partııanyń Res­pýb­lıkalyq qoǵamdyq qabyldaý bólmesiniń ju­mysymen de tanysty. Ortalyq meń­ge­rýshisi Álııa Sadyrbaeva Saılaý týraly zańǵa sáıkes, partııanyń qoǵamdyq qabyl­daýlary halyqqa kómek jáne keńes berý ju­mysynyń toqtatylǵanyn aıtty. Buǵan deıin azamattardyń talap-tilekteri qoǵam­dyq qabyldaýlardan bólek Call-ortalyqtar, partııanyń saıty men elektrondy poshtasy, egov.kz elektrondy úkimet portaly, WhatsApp messenjeri arqyly qabyl­danypty.

«Amanat»-tyń atynan saılaýǵa túsetin depýtattardyń esimi de partııa sezinde belgili bolady. Úmitkerlerdi tańdaýda «ashyq­tyq, ádildik jáne jańarý» prınsıpi negizge alynbaq.

– Kandıdattardy tańdaýdyń ózindik algorıtmi bar. Ár bastaýysh partııa uıymy óziniń eń belsendi degen úmitkerin usynady. De­legattardyń arasynda da kandıdattar bolýy múmkin. Odan keıin aýdandyq jáne oblys­tyq konferensııalarda daýys berý nátıjesinde kimniń úlesi kóbirek bolsa, biz sol azamatty saılaýǵa kandıdat retinde tirkeımiz. Búkil prosess ashyq ári ádil ótedi. Eń belsendi, bilimdi, bilikti azamattar osy tizimge enýi kerek. Buǵan qosa ár túrli jas ókilderi, jastar, áıelder, túrli mamandyq ıeleri bolýy tıis. Jalpy, ótken shaqyrylymmen salystyrǵanda tizimde jańa esimder kóp bolady, – dedi partııa ókili.

Elnur Beısenbaevtyń aıtýynsha, «Ama­nat» barlyq depýtattyq mandatqa óz kan­dıdattaryn usynýdy josparlap otyr. Jalpy, Májilistegi 98 mandattyń 69-y partııalyq tizim boıynsha, 29-y bir mandatty okrýgter boıynsha bólinedi. Sonymen qatar respýblıka boıynsha 223 máslıhatta saılaý ótip, onda 3415 depýtat saılanady.

Partııa ujymy saıası naýqanǵa 20 myń baıqaýshy men 10 myń senimdi ókilin da­ıyndap qoıǵan. Ári aldaǵy úgit jumysyna jer-jerde saılaý shtabtaryn quryp, qyzý daıyndyqty bastap ketken.

– Biz ashyq ta tartysty básekege da­ıynbyz. Baǵytymyz – Ádiletti Qazaqstan, maqsatymyz – memlekettiń tutastyǵy, táýel­sizdiktiń baıandy bolýy, – dep túıindedi E.Beı­senbaev.

Aıta keteıik, elimizdiń barlyq óńirinde partııanyń 243 qoǵamdyq qabyldaý orta­lyǵy bar. Byltyr turǵyndardyń 90 paıy­zynyń talap-tilegi oń sheshilse, qalǵan 10 paıyzynyń aryz-shaǵymy qaralyp jatyr. О́tinishterdiń basym bóligi áleýmettik sala, turǵyn úı-kommýnaldyq sharýashylyq, eń­bek qatynastary, medısınalyq qyz­met­ter­diń sapasy jáne taǵy basqa túıitkildi máse­lelerge qatysty.