Búgin - Qazaqstan men Eýropalyq Odaq dıplomatııalyq qarym-qatynas ornatqan kún

Qazaqstan Respýblıkasy Premer-mınıstriniń orynbasary – Syrtqy ister mınıstri Muhtar Tileýberdi jáne Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy О́kili – Eýropalyq Komıssııanyń Vıse-prezıdenti Jozep Borrell dıplomatııalyq qarym-qatynastardyń 30 jyldyǵyna oraı birlesken málimdeme jasady.

«Áriptestik jáne yntymaqtastyq týraly kelisimge qol qoıylǵannan bastap 2020 jyly Keńeıtilgen áriptestik jáne yntymaqtastyq týraly kelisim (KÁYK) kúshine engenge deıin bizdiń serpindi qarym-qatynasymyz uzaq joldan ótti.

Qazirgi ýaqytta Keńeıtilgen áriptestik jáne yntymaqtastyq týraly kelisim ekonomıka, saýda jáne ınvestısııa salalarynan bastap avıasııa, bilim berý jáne zertteý, azamattyq qoǵam men adam quqyqtary salasyndaǵy áriptestikke deıin yntymaqtastyqtyń 29 salasyn qamtıdy. Qazaqstan men EO KÁYK-ty tolyq iske asyrý maqsatynda ózara tıimdi ekijaqty qatynastardy odan ári damytýǵa jáne nyǵaıtýǵa berik ustanymyn saqtap otyr.

EO «Ádiletti Qazaqstan» tujyrymyn ilgeriletýge baǵyttalǵan Qazaqstannyń mańyzdy saıası jáne ekonomıkalyq reformalaryn, sondaı-aq 2022 jylǵy qańtar oqıǵalaryna tolyq jáne ashyq tergep-tekserý júrgizýge eldiń beıildiligin tolyq qoldaıtynyn taǵy da málimdeıdi.

Shıkizat, akkýmýlıatorlyq batareıalar men jasyl sýtektiń turaqty qun tizbekteri jónindegi strategııalyq áriptestik týraly jaqynda qol qoıylǵan ózara túsinistik memorandýmy jasyl jáne sıfrlyq tehnologııalarǵa kóshý úshin mańyzdy ról atqaratyn bolady. Biz joǵary deńgeıdegi baılanystardy keńeıtýdi, parlamenttik yntymaqtastyqty tereńdetýdi, iskerlik jáne adamdar arasyndaǵy baılanystardy nyǵaıtýdy, sondaı-aq adam quqyqtary men zań ústemdigi jónindegi dıalogty jalǵastyratyn bolamyz.

Qazirgi geosaıası turǵyda biz BUU Jarǵysyna, halyqaralyq quqyqqa jáne egemendik pen aýmaqtyq tutastyqtyń qaǵıdattaryna berik beıildiligimizdi rastaımyz. Beıbitshilik pen qaýipsizdikti saqtaýdyń, sondaı-aq daýlardy dıplomatııalyq jolmen sheshýdiń mańyzdylyǵyn atap ótemiz.

Biz EO men Ortalyq Azııa arasyndaǵy yntymaqtastyq úshin berik ári bolashaǵy zor negiz qurýǵa, sondaı-aq órkendeýdiń, turaqty jáne ornyqty damýdyń irgetasy bolyp tabylatyn Ortalyq Azııadaǵy óńirlik dıalogty nyǵaıtýǵa degen umtylysymyzdy taǵy da rastaımyz. Kelesi qadam retinde biz 2023 jyly Qazaqstanda Almaty qalasynda EO – Ortalyq Azııa Ekonomıkalyq forýmyn ótkizýdi asyǵa kútemiz.

Qarym-qatynastarymyz úshin osy mańyzdy jyly biz meılinshe tyǵyz jáne jan-jaqty yntymaqtastyǵymyzdyń bolashaǵyna senimmen qaraımyz. Ony Eýropalyq Odaq pen Qazaqstan halqynyń ózara ıgiligi úshin, sondaı-aq zor óńirlik turaqtylyq pen órkendeý jolynda ilgeriletýge bel býdyq», dep jazylǵan málimdemede.