Mınıstr Saıasat Nurbek «Joǵary bilim berýdi sıfrlandyrý: ósýdiń jańa kókjıekteri» atty paneldik sessııada sóz sóılep, moderator boldy. О́z baıandamasynda ol sıfrlandyrý jaǵdaıynda joǵary bilim berýdi damytý erekshelikterin jáne oqý prosesindegi sıfrlandyrý múmkindikterin atap ótti.
Vedomstvo basshysynyń aıtýynsha, sıfrlyq tehnologııalardyń arqasynda paıda bolǵan oqytýdyń jańa tásilderi joǵary bilim berý modeli úshin jańa máseleler týdyryp jatyr. Stýdentterdiń talaptary artyp keledi. Bolashaqta stýdentter sıfrlyq dáýirdiń múmkindikterin barynsha paıdalanatyn jáne bolashaq damýdy boljaıtyn joǵary oqý oryndaryna tartylatyn bolady.
«Kelesi oqý jylynan bastap biz «Sıfrlyq ýnıversıtetterge transformasııalaý» jobasyn pılottyq rejımde iske qosýdy josparlap otyrmyz. Bul jobaǵa sıfrlyq ýnıversıtet modelin engizýde tájirıbesi bar iri seriktesterdi tartatyn bolamyz. Solardyń biri - Microsoft komandasy. Sıfrlyq ýnıversıtet modeli 4 negizgi aspektini qamtıdy. Olar: bilim berý qyzmeti, kampýs pen IT ınfraqurylymy, ǵylymı qyzmetti sıfrlyq transformasııalaý jáne biryńǵaı sıfrlyq platforma servısterin damytý. Bolashaqta bul tájirıbe elimizdiń barlyq joǵary oqý oryndaryna taratylatyn bolady», dep atap ótti Saıasat Nurbek.
Memleket basshysynyń tapsyrmasy boıynsha stýdentterdiń álemdik sıfrlyq kitaphanalarǵa, onyń ishinde Coursera platformasyna qoljetimdiligin qamtamasyz etý jumystary bastaldy.
