Úmitkerlerdi tirkeý bastaldy

«Aýyl» partııasy Májilis saılaýyna 25 kandıdat usynyp otyr. Ko­mıs­sııa qyzmetkerleriniń aıtýynsha, ondaǵy jastardyń úlesi talapqa saı keledi. Buǵan deıin partııanyń eki kandı­daty ótken jyly Prezıdent saı­laýyna, sondaı-aq 7 múshesi 2021 jyly Parlament Májilisiniń saılaýyna qatysqan. Osy joly usynylǵan 25 kan­dı­dattyń 15-niń agrarlyq bilimi bar.

– Kandıdattar tizimi partııamyzdyń sezinde bekitildi. 25 úmitkerdiń 6-y áıel, 3 jas kandıdat jáne ınklıýzıvti qo­ǵamnyń bir ókili bar. Zańdyq turǵydan alǵanda barlyq talaptarǵa saı kelip turmyz, kvota 36 paıyzǵa oryndaldy. Kan­dı­dattarymyzdyń orta jasy 43 jasty qu­raıdy, eń jas kandıdatymyz 25 jasta. Aldaǵy saılaýǵa úmitimiz zor, talaby­myz da jaqsy. Bizdiń partııadan 237 adam májilis depýtaty boldy, – dedi «Aýyl» HDP tóraǵasynyń orynbasary Anas Baqqojaev.

Sondaı-aq buǵan deıin ortalyq «Qazaqstan Halyq partııasy», «Aq jol», «Jalpyulttyq sosıal-demokratııalyq partııa» jáne «Baıtaq» partııalarynyń qujatyn qabyldaǵan edi. «Aq jol» partııa­synyń kóshbasshysy Azat Perýa­shevtiń aıtýynsha, partııadan partııalyq tizim boıynsha – 54, bir mandattyq okrýg boıynsha 24 kandıdat usynylǵan.

– Saıası partııalar negizi kelesi saılaýǵa daıyndyqty ótken saılaýdyń erteńinen bastaýlary kerek. Biz osy qaǵıdany ustanyp, qajetti jumysty bastap kettik, endigi saılaýǵa daıynbyz, – dedi Azat Perýashev.

Azat Perýashevtiń ózi partııalyq tizim boıynsha kandıdattyqqa usynylyp otyr jáne ár partııa jetekshisi dál osylaı áreket etýi tıis dep esepteıdi. Bir mandatty okrýg boıynsha «Aq joldan» úmitkerler arasynda Aqmola oblysynan Merýert Qazbekova jáne Pavlodar oblysynan Fýat Satybaev sekildi BAQ ókilderi de bar. Partııalyq tizimde jas kásipkerler de tabyldy, eń jasy 25-ten endi asqan.

– Árıne, biz tájirıbeli depýtat retinde saıası arenada ózin tanytyp úlgergenderdi ǵana usynbaımyz. Min­detimiz – jańa kóshbasshylardy jeteleý, sondyqtan jańa tulǵalardyń sany aıtarlyqtaı kóp bolady. Jalpy, jastardy dáriptep jatqanymyz – jeke qalaýym ǵana emes, zań talaptaryna da saı kelip tur. Biz jastarǵa, áıelderge jáne múgedekterge arnalǵan 30 paıyzdyq kvotany tolyq oryndap turmyz. Aıta ketý kerek, bul kvota 5 jáne 6-shaqyrylymdarda engizilgenge deıin Májilistegi «Aq jol» fraksııasynyń 40 paıyzǵa jýyǵyn áıelder qurady, – dedi partııa jetekshisi.

Sonymen qatar «Jalpyulttyq sosıal-demokratııalyq partııa» atynan qujattardy Ortalyq saılaý komıssııasyna partııanyń saıası birlestigi ortalyq apparatynyń jetekshisi Talǵat Omarov tapsyrdy.

– Biz JSDP-dan Májiliske kandı­dat­tardyń tizimin sanaly túrde túzdik, bar­lyǵy – 19 adam. Majorıtarlyq júıe boıynsha saılaýǵa alty kandıdat – Atyraý, Qostanaı, Qyzylorda, Pavlo­dar, Aqmola oblystary men Almaty qala­synan qatysady. Olar qujattardy ýchas­kelik komıssııalarǵa tapsyrdy, – dedi ol.

Talǵat Omarov JSDP aýyl turǵyn­dary­nyń máselelerin kóterip, bul suraq­tardy sheshýge bar kúsh-jigerin salyp jat­qanyn atap ótti. Aıtýynsha aýyl tur­ǵyn­dary Parlament deńgeıinde sheshýdi qajet etetin máseleler bar ekenin túsinedi. Sondyqtan quramynda tanymal tulǵalary bar partııa saılaýshylardyń qoldaýyna úmit artady. Sondaı-aq ol ótken saılaýlarǵa qatyspaýynyń sebebin aıtyp ótti.

– Partııanyń ótken saılaýǵa qatysý­dan bas tartýynyń basty sebebi – saılaý zań­namasynyń jetildiril­megen­digi. Biz­de senimsizdik boldy, óıt­keni saılaý ýchas­keleriniń barlyq hat­ta­malaryn jarııa­laý týraly usyny­symyz elenbedi. Qazir ózgerister engizildi, árıne, biz qala­ǵandaı emes. Biraq zańnamada áli de shı­kilik bar, odan ári jetiletinine úmit­tenemiz. Al biz Parlamentte ókildik etsek, bul úshin bar kúshimizdi salamyz. Onda elektoratymyzdyń múddesin bildirý úshin kúresetin bolamyz, – dedi JSDP ókili.

Al «Baıtaq» jasyldar partııasynyń úmitkerler tizimin uıym tóraǵasy Azamathan Ámirtaı tapsyrdy. Májilis saılaýyna kandıdattardyń 18-i – partııalyq tizim, tórteýi bir mandatty okrýgter boıynsha qatysady. «Baıtaqtyń» saıası birlestik retinde qurylǵanyna eki aı ǵana bolǵanymen, «jasyldar» 2015 jyldan beri belsendi jumys istep keledi. Olar basty nazardy Aral, Semeı, Qazaqstannyń batysyndaǵy jer qoınaýyn paıdalaný qaldyqtary problemasyn sheshýge aýdaryp keledi. «Baıtaq» partııasy kómirqyshqyl gazynyń nóldik shyǵyndylaryna qol jetkizý úshin úlken kúsh salýdy josparlap otyr. Azamathan Ámirtaı bastapqyda 43 partııa múshesiniń tizimi qaralǵanyn aıtty. Biraq sońynda olar tek 18-in qaldyrýdy uıǵarǵan.

– Negizgi másele – qarjylandyrý, sondyqtan shyǵyndardy azaıtý týraly sheshim qabyldandy. Sońǵy jeti jylda partııany óz qarajatymnan qarjy­landyrdym. Osy kúnge deıin demeýshi tappadyq, memleket aqshasyna qol jetkizbedik. О́zim Astana qalasyndaǵy bir mandatty okrýgten Májilis saılaýyna qatysamyn, qujattarymdy tapsyryp qoıdym, – dedi Azamathan Ámirtaı.

Aıta keteıik, partııanyń úmitkerleri Qyzylorda, Túrkistan oblystary, Almaty jáne Astana qalalaryndaǵy bir mandatty saılaý okrýgteri boıynsha da usynylyp jatyr.