Mınıstr kýrstasy Mırýs Qazaqstannyń IT-salasyn damytýǵa úlken úles qosqanyn jáne dinge berik ekenin jazdy.
«Sońǵy úmit oty sóndi. Sengim kelmeıdi…Sońyna deıin úmittenip edik. Alaıda Mırýs baýyrymyzdan aıyrylyp qaldyq. Mırýs ekeýimiz kýrstas boldyq. Ol óte kreatıvti edi, aýqymdy dúnıeler jasaǵysy keletin, tartymdylyǵynyń arqasynda adamdardy uıymdastyra alatyn. Dinge berik adam edi. Maǵjan Astana Habty qurý boıynsha alǵashqy qadamdaryn bastaǵanda ol kóp kómek etti, tegin, eshqandaı kelisimsiz. Qolynan kelgenin istep, Qazaqstannyń IT-salasyn damytýǵa úlesi men kómegin qosty. Qazaqstanda onyń birneshe bıznes bastamalary bolǵan, 2020 jyly memlekettiń qatysýymen bir-eki jobany iske asyrǵysy keldi. Biraq Memleket basshysy meni mınıstr etip taǵaıyndaǵan kezde ol jobalardan óz erkimen bas tartty. Aramyzda túsinispeýshilik týdyratyn jaǵdaılardy boldyrmaý úshin men ıdeıalarymdy shetelde júzege asyramyn degen edi», dep jazdy Baǵdat Mýsın.
Baǵdat Mýsınniń jazýynsha, Mırbolat Qurmashev jıhankez bolǵan, biraz jerdi aralaǵan. Biraq turaqtap qalý úshin Túrkııany tańdap, sońǵy eki jyl negizinen sol jaqta turyp jatqan.
«Prezıdenttiń Ankaraǵa resmı saparynyń aldyndaǵy qazaqstandyq IT-mamandarynyń sol jaqqa barǵanyn bárińiz biletin shyǵarsyzdar. Biz sol kezde olardy Ystanbuldyń birneshe iri IT-kompanııasyna aparǵan edik. Mırýs osy is-sharanyń negizgi uıymdastyrýshysy boldy. Biz oǵan Astana habtyń ókili bolýdy usyndyq, óıtkeni eki memlekettiń habtary men mamandaryn jaqyndastyratyn adamnyń bolýy mańyzdy edi. Stýdenttik kezden de biraz jaqsy estelikter bar, jaqyn aralasqan joldastary olardy aıta jatar dep oılaımyn. Imandy bolsyn! Janyń jánnattan oryn tapsyn baýyrym», dep jazbasyn aıaqtady.
10 aqpanǵa qaraǵan túni Antakııada úıindi astynan Mırbolat Qurmashevtiń denesi tabyldy. Aıta keteıik, Mırbolat Qurmashev Astana Hub tehnoparkiniń halyqaralyq agenti bolǵan.
