«Qazirgi tańdaǵy geosaıası ahýal, jahandy alańdatqan jańa syn-qaterler, qubylmaly ekonomıka álemniń damýyna aıtarlyqtaı saldaryn tıgizip otyr. Osyndaı sátte tatýlyqqa taban tirep, birlesip áreket etýdiń asa mańyzdy ekeni aıtpasa da túsinikti. Kıeli Túrkistan shaharynda ótken Ortalyq Azııa memleketteriniń birinshi parlamentaralyq forýmynda óńirdegi áriptesterimizben birge osy máselelerdi keńinen talqyladyq», dep jazdy M.Áshimbaev.
Forým Qoja Ahmet Iаsaýı kesenesin zııarat etip, baba rýhyna taǵzym etýmen bastalǵan. Kıeli orynda joıqyn zilzaladan zardap shekken túrik aǵaıyndarǵa sabyr tilep, qaza tapqandardyń rýhyna duǵa baǵyshtaldy.
Jalpy alǵashqy jıynnyń Túrkistan tórinde ótýi tegin emes. Tarıhy men tamyry bir elder úshin bul qalanyń mańyzy zor. Ásirese, mádenı jáne rýhanı turǵyda shahardyń orny bólek. Sondyqtan ǵasyrlar boıy qalyptasqan tyǵyz yntymaqtastyqty odan ári nyǵaıtý úshin baýyrlas halyqtardyń qasterli mekende bas qosýy zańdy qubylys ekeni anyq.
«Qazirgi tańda Ortalyq Azııa aımaǵynda memleketaralyq dıalog jańa sapaly deńgeıge kóterilgen. Bul – bizdiń Prezıdentterimizdiń naqty ári dáıekti qadamdarynyń nátıjesi. Osyndaı tyǵyz yntymaqtastyqty zań shyǵarýshy organdar tarapynan qoldap, ári qaraı damytýdyń mańyzy zor. Osyǵan oraı byltyr shilde aıynda Ortalyq Azııa Memleketteri basshylarynyń Konsýltatıvtik kezdesýinde atalǵan Forýmdy ótkizý týraly bastama qolǵa alyndy. Basty maqsat – óńirdiń birtutastyǵyn nyǵaıtýda Parlamentterdiń rólin arttyrý. Osylaısha, aımaqtaǵy parlamentaralyq yntymaqtastyqtyń jańa kezeńi bastalyp otyr», delingen jazbada.
Qazaqstan Respýblıkasynyń Prezıdenti Qasym-Jomart Kemeluly Toqaev Forýmǵa qatysýshylardy quttyqtap, Úndeý joldady. Memleket basshysy Parlamentaralyq forým der kezinde qolǵa alynǵan mańyzdy bastama ekenin atap ótti.
Is-sharaǵa qatysýshylar ortaq tarıhı jáne mádenı muralarymyzdy dáripteýge, zııalylar arasyndaǵy baılanysty arttyrýǵa, óńir jurtyn alańdatqan máselelerdi birlesip sheshýge qatysty naqty usynystar aıtty. Onyń bári nazarǵa alynyp, Forýmnyń qorytyndysy boıynsha qabyldanǵan Túrkistan deklarasııasynda qamtyldy.
«Sonymen qatar Forým aıasynda Qyrǵyz Respýblıkasy Jogorký Keneshiniń Tóraǵasy Nurlanbek Shakıevpen, О́zbekstan Respýblıkasy Olıı Majlısi Senatynyń Tóraıymy Tanzıla Narbaevamen jáne Tájikstan Madjlısı namoıandagon Madjlısı Olı Tóraǵasy Mahmadtoır Zokırzodamen ekijaqty kezdesýler ótkizip, parlamentaralyq yntymaqtastyqty arttyrý máseleleri jóninde sóz qozǵadyq. Aldaǵy ýaqytta Forým baýyrlas elderdiń yntymaqtastyǵyn nyǵaıtýǵa eleýli úles qosatyn tıimdi jáne turaqty alańǵa aınalady dep senemiz», dep jazdy Máýlen Áshimbaev.
