Memleket basshysynyń tapsyrmasymen jer silkinisi bolǵan aýdandardaǵy zardap shekkenderge kómek kórsetý úshin shatyrlar, jylytqyshtar, jyly kıimder jáne basqa da turmysqa eń qajetti zattar jiberiledi.
Túrkııadaǵy zilzala bolǵannan beri elimizdegi eriktiler, belsendiler gýmanıtarlyq kómek uıymdastyryp, qarjylaı qoldaý kórsetip jatyr. Túrkııanyń Qazaqstandaǵy Elshiligi jınalǵan qarjy boıynsha málimdeme jasap, qazaq jurtyna alǵys aıtty.
«Qazaqstanda sońǵy 3 kúnde jer silkinisinen zardap shekkenderge kómek kórsetý shotyna jınalǵan 1 mln 28 myń 706 dollar kólemindegi qarajat AFAD-tyń resmı shotyna aýdaryldy. Osylaısha qaıyrymdylyqtyń jalpy somasy 2 mln 849 myń 836 dollardy qurady», delingen Elshiliktiń resmı habarlamasynda.
Sondaı-aq Aqparat jáne qoǵamdyq damý mınıstri Darhan Qydyráli eriktiler tarapynan jınalǵan kómektiń esebin jarııalady.
– Ulttyq volonterler jelisi Aqparat jáne qoǵamdyq damý mınıstrliginiń úılestirýimen azamattardan 80 mln teńge jınady. Birshama kerek-jaraq Qazaqstandaǵy Túrkııa Elshiligine tapsyryldy. Bul jumys aldaǵy ýaqytta da jalǵasady. Qınalǵanǵa qol ushyn sozǵan barlyq volonterge alǵys aıtamyz, – dedi mınıstr.
Al Túrkııaǵa kıiz úı jetkizýdi alǵashqy bolyp qolǵa alǵan, bastama kótergen jýrnalıst, belsendi Nurbek Bekbaý halyq qarajatyna satyp alynǵan júzden astam kıiz úıdiń basym bóligi Túrik eline endi jetkizilgenin aıtty. Otandastarymyz qazir Qaharmanmarash qalasynda zardap shekken halyqqa kómek kórsetip júr.
– 90-ǵa jýyq kıiz úıdi tıep ap, kóp kútken ushaǵymyz kele jatyr. Kartaǵa qarap, baǵyp otyrmyz. Saǵat 13:00-de Adanaǵa qonǵannan keıin júkterdi Qaharmanmarashqa alyp kelemiz. Qyrǵyz baýyrlar bizden buryn boz úılerin ákep, tigip qoıdy. Nege olar birinshi boldy? О́ıtkeni bizder kıiz úı satyp alýǵa jylý jınaı bastaǵanda qyrǵyz depýtattary prezıdentterine «Biz de 100 kıiz úı aparaıyq» degen usynysyn aıtty. Prezıdentteri birden tapsyrma berip, arnaıy aýyr ushaq daıyndatyp, oǵan kıiz úılerdi tıep, Túrkııaǵa ákele qoıdy. Al biz she? «100 kıiz úı» naýqanynyń basy-qasynda júrgen top – qarapaıym azamattar. Biraq basqalar memlekettik deńgeıde qolǵa alǵan sharýany biz 3-4 adam bolyp-aq atqardyq, – dedi Nurbek Bekbaý.
Jýrnalıstiń aıtýynsha, kıiz úıler satyp alýǵa qajetti qarjy tez jınalǵanymen, olardy jetkizý ońaı bolmapty.
– Ushaq máselesi kádimgideı qıyndyq týdyrdy. Alǵashynda Air Astana áýe kompanııasyna habarlasqanymyzda obaly ne kerek, «úlken júk ushaǵymyz joq» dep jaǵdaıdy aıtyp túsindirdi. TJM «Kıiz úılerdi tek aqpannyń 20-larynda ákete alamyz. Sol kezde, mınıstrliktiń sarbazdaryn áketýge baramyz. Ushaǵymyz bos ketpes úshin, tıep alyp keteıik», dedi. Bul tym kesh bolar edi. Sodan «Turkish Airlines»-qa Kargo ushaq berseńizder» degen ótinishpen shyqtyq. Kelisim boıynsha olar juma nemese senbi kúni kıiz úılerdi tıep, ákelýi kerek bolǵan. Biraq biz qatardaǵy azamattarmyz. Memlekettik deńgeıdegi sheneýnik emespiz. Sondyqtan «Turkish Airlines» Túrkııaǵa shuǵyl zat ákelý kerek bolyp, álemniń ár buryshyna Kargosyn aıdap ketip jatty. Bizge «qoly tımeı ketti». Eger bizdiń júkti Túrkııaǵa jetkizý máselesi memlekettik deńgeıde qolǵa alynsa, senbi kúni aqshańqan qazaq úıleri osy jaqta jaınap turar edi. Bar sebep osy ǵana, – dep jaǵdaıdy túsindirdi belsendi.
Al Jazeera aqparat agenttiginiń sońǵy aqparaty boıynsha, Túrkııa men Sırııadaǵy jer silkinisinen qaza tapqandar sany 36 myńnan asqan. Túrkııada 31 643 adamnyń máıiti tabylsa, Sırııada 4 614 adamnyń qaza bolǵany rastaldy.
Sırııa prezıdenti Bashar Asad BUU-nyń Sırııanyń soltústik-batysyndaǵy kóterilisshiler baqylaýyndaǵy aımaqtarǵa Túrkııadan taǵy eki shekara ótkeli arqyly kómek jetkizýge ruqsat berýge kelisti. BUU málimetinshe, jer silkinisinen keıin Sırııada 5,3 mln-ǵa jýyq adam baspanasyz qalýy múmkin.
